Намояндаҳои Ҳаракати сиёсии “Гурӯҳи 24”, ки барои истиқболи Эмомалӣ Раҳмон дар Рум, пойтахти Итолиё боздошт гардида буданд, озод шуданд.
Бино ба иттилои расмӣ, мақомоти Рум, пойтахти Итолиё, намояндагони боздоштшудаи “Гурӯҳи 24”-ро, ки барои иштирок дар тазоҳурот бар зидди сафари Эмомалӣ Раҳмон ба ин кишвар рафта буданд, баъд аз 26 соати тафтишу таҳқиқ кардан ҳамаи онҳоро озод кардаанд.
Ҳаракати сиёсии “Гурӯҳи 24” мақомоти Тоҷикистонро ба он муттаҳам кардааст, ки пеш аз сафари Эмомалӣ Раҳмон ба Итолиё маълумоти хусусии аъзои “Гурӯҳи 24”-ро дар ихтиёри мақомоти Итолиё гузоштаанд, то аз ташкили гирдиҳамоии аъзои ин гурӯҳ бар зидди сафари Раҳмонов пешгирӣ кунанд.
Ба қавли манбаъ, ин афроди боздоштшуда, “аз санаи 23-уми апрел, соати 15:00 дастгир шуданд ва дар санаи 24-уми апрел, соати 17:00 бо вақти Аврупо озод карда шуданд. Полисҳои шаҳри Рум пас аз тафтишоти мақомоти шаҳри Рум аз ҳисоби оне, ки ҳеч асари қонуншикание аз онҳо пайдо накарданд, озод карданд.”
Пеш аз ин иҷрокунандаи вазифаи раҳбарии “Гурӯҳи 24” Ҳусейн Ашӯров бо нашри як навори видеоӣ аз мақомоти Итилоё, ҳамчун як кишвари демократӣ хоста буд, ки намояндаҳои ин гурӯҳро, ки дар Рум боздошт шудаанд, озод кунанд.
Гуфта мешавад, мақомоти Тоҷикистон ҳанӯз ду моҳ пеш аз сафари Эмомалӣ Раҳмон ба наздикону пайвандони мухолифин бо роҳҳои мухталиф паём дода буданд, ки аз фарзандону пайвандони худ дар Аврупо бихоҳанд, ки ин дафъа ба мисли сафари қаблии Эмомлаӣ ба Берлин гирдиҳамоии эътирозӣ ташкил накунанд. Мухолифин Эмомалӣ Раҳмонро соли гузашта дар Берлин бо ҷамъомадҳои эътирозӣ ва тухмҳои рангин “пешвоз” гирифта буданд.
