Маҷлиси намояндагони Маҷлиси Олии Тоҷикистон Созишнома байни Тоҷикистон ва Қатар дар мавриди истирдоди шаҳрвандони ҳамдигарро тасвиб кард.
Парлумони Тоҷикистон ҳамзамон Созишнома дар бораи бозпас додани маҳкумшудагон барои адои идомаи ҷазо байни Тоҷикистон ва Қатар ва Созишнома дар бораи ёрии дуҷонибаи ҳуқуқӣ оид ба парвандаҳои ҷиноятӣ байни Тоҷикистон ва Қатарро низ ба тасвиб расонд.
Тафсилоти ин созишномаҳо маълум нест, вале ба иттилои расонаҳо, созишнома дар бораи истирдод ва бозпас гардондани муттаҳамонест, ки аз тарафи ин ду кишвар дар пайгард қарор доранд ва дар яке аз ин кишварҳо дастгир мешаванд.
Гуфта мешавад, вакилони Маҷлиси намояндагони кишвар бо раҳбарии Маҳмадтоир Зокирзода инчунин созишномаи қарзӣ дар бораи лоиҳаи НБО-и “Роғун” байни Тоҷикистон ва Фонди рушди Саудиро низ тасвиб намуданд.
Ин дар ҳолест, ки моҳи октябри соли гузашта мақомоти Тоҷикистон дар мулоқот бо масъулони Фонди рушди Саудӣ масъалаи сармоягузорӣ дар лоиҳаи НБО-и “Роғун”-ро матраҳ карда буданд, вале маълум мешавад, ки ин фонди молиявӣ на барои сармоягузорӣ, балки барои додани қарз ба ин лоиҳа мувофиқат кардааст.
Он замон гуфта мешуд, ки раиси Фонди рушди Саудӣ Султон бин Абдурраҳмон Ал-Маршид дар бораи сармоягузории кишвараш ба лоиҳаи НБО-и “Роғун” дар вақти мулоқот бо Рустами Эмомалӣ, раиси Маҷлиси миллии Маҷлиси Олии Тоҷикистон дар шаҳри Душанб иттилоъ дода буд.
