Парвозҳои мустақим миёни Тоҷикистон ва Узбекситон оғоз мешаванд

Бино ба иттилои хабаргузории ҳукуматии “Ховар” Икром Субҳонзода директори Агентии авиатсияи граждании назди Ҳукумати Ҷумҳурии Тоҷикистон гуфтааст:

“Дар масъалаи паврозҳои мустақим байни мақомоти авиатсионии Тоҷикистон ва Узбекистон гуфтушунид идома дорад, то ба эътидол омадани вазъияти эпидемӣ интизор меравад, ки шурӯъ аз моҳи март байни Душанбе ва Тошканд парвозҳои мунтазами ҳавопаймоҳо ба роҳ монда шаванд”.

Рӯзи 5 январи соли равон баъд аз чанд моҳи таваққуф дар масири Душанбе -Тошканд парвози махсус аз ҷониби ширкати миллии ҳавопаймоии Узбекистон - «Ӯзбекистон ҳаво йуллари» /Uzbekistan Airways/ анҷом дода шуд.

Парвозҳои мустақим дар хатсайри Душанбе -Тошканд пас аз густариши бемории сирятии COVID-19 қатъ гардид. Тоҷикистон ҳоло танҳо бо Туркия ва Имороти Муттаҳидаи Араб парвозҳои мустақим дорад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.