Мақомоти чандин вилояти Русия аз боло бурдани нархи иҷозатномаи корӣ (патент) барои муҳоҷирон дар соли 2026 хабар доданд. Ин иқдом метавонад ба садҳо ҳазор муҳоҷири тоҷик, ки дар ин кишвар фаъолият доранд, таъсири мустақим расонад.
Бар асоси хабарҳо дар вилояти Новосибирск нархи патент аз соли нав 11 дарсад зиёд шуда, ба 10 860 рубл мерасад, ки тақрибан 2950 рубл бештар аз соли гузашта мебошад. Ба гуфтаи мақомот, аз миёни 58 ҳазор муҳоҷири кории ин вилоят, 37 дарсад шаҳрвандони Тоҷикистонанд.
Дар Санкт-Петербург ва вилояти Ленинград аз 1-уми январи соли 2026 нархи иҷозатномаи кор аз 6 ҳазор ба 8 ҳазор рубл хоҳад расид. Дар вилояти Иркутск низ муҳоҷирон ба ҷойи 10 900 рубл, минбаъд 12 231 рубл пардохт хаҳанд кард.
Дар минтақаи Камчатка арзиши патент аз 9 027 то 13 776 рубл боло бурда мешавад, дар ҳоле ки дар Свердловск он аз 7 500 ба 9 500 рубл хоҳад расид.
Муҳоҷирони тоҷик, ки аксаран тавассути “патент” дар Русия кор мекунанд, мегӯянд, болоравии нарх фишори зиёдеро ба буҷаи онҳо меорад. Бо вуҷуди ин, кор бе “патент” дар Русия ғайриқонунӣ буда, ҳамасола садҳо муҳоҷир бо ҳамин сабаб аз Русия ихроҷ мешаванд.
Моҳи гузашта Президенти Русия Владимир Путин дар мулоқот бо намояндагони Думаи давлатӣ пешниҳод кард, ки низоми кунунии “патент” баррасӣ шуда, имкони ҷалби муҳоҷирон тавассути квотаҳо ё саҳмияҳо ба ҷойи пардохти моҳонаи “патент” баррасӣ гардад.
Коршиносон мегӯянд, афзоиши нархи иҷрзати кор метавонад муҳоҷирони зиёдеро ба фикри бозгашт ба Ватан ё ҷустуҷӯи алтернативаи дигар водор созад.
