Музокироти Миср дар бораи поён додан ба ҷанги Исроил алайҳи Навори Ғаззаи Фаластини бидуни натиҷа поён ёфт.
Бино ба иттилои шабакаи “Ал-Ҷазира” имрӯз, 5-уми марти соли 2024 музокироти ҳайати Нерӯҳои муқовимати исломии Фаластин (ҲАМОС) бо раиси Кумитаи амнияти Миср ва гуфтугӯҳои дурӯзаи Қоҳира байни миёнҷиҳо бидуни натиҷа ба анҷом расидааст.
Пеш аз ин ҳайатҳои музокиракунанда аз кишвраҳои Амрико, Фаронса, Мисру Қатар ва Исроил дар Порис гирдиҳам омада, таъкид карда буданд, ки ҷанги Исроил алайҳи Ғазза бояд пеш аз оғози моҳи Рамазон хотима ёбад, вале дар он нишаст ҳам ба натиҷаи ниҳоӣ нарасида буданд.
Ин ҳайат барои идомаи музокирот ду рӯз пеш, 3-уми марти соли ҷорӣ дар Қоҳираи Миср ҷамъ омаданд, вале Исроил ҳайати музокиракунандаи худро ба баҳонаи он, ки ҲАМОС феҳристи асирони исроилиеро, ки бояд мубодила карда мешаванд, пешниҳод накардааст, ба Қоҳира нафиристод.
Аз сӯи дигар, ҲАМОС ҳам Исроилро ба он муттаҳам кардааст, ки бо ин баҳонаҷӯиҳояш аз идомаи музокирот худдорӣ мекунад ва он қасди эълони оташбас карданро надорад. Ба ин хотир, ҲАМОС ҳамчун эътироз дар ҳоли ҳозир гузинаи хориҷ шудан аз раванди музокирот барои эълони оташбас ва мубодилаи асронро рӯи миз гузошта, паёмадҳои онро меомӯзад.
Гуфта мешавад, Исроил 17 сол қабл Навори Ғаззаро дар муҳосираи худ қарор дода, атрофи онро девор гирифт. Дар ин муддат ҳамагуна содирот ва воридот ба Навори Ғаззаро зери назорати шадиди худ қарор дода, фишори зиёде болои сокинони он меовард. Ин муҳосира дар 5 моҳи ахир шадидтар шудааст.
7-уми октябри соли 2023 нерӯҳои фаластинӣ бо раҳбарии ҲАМОС ва Ҷиҳоди исломӣ аз чанд ҷо деворҳоро шикаста, ба сарзаминҳои ишғолӣ ҳамла карданд. Исроил мегӯяд, ки нерӯҳои фаластинӣ дар вақти ҳамлаи худ ҳудуди 1200 нафарро кушта ва беш аз 260 нафари дигарро ба асорат гирифтанд. 8-уми октбяри соли 2023 Исроил ҳамлаҳои худ ба Навори Ғаззаро оғоз кард ва то ҳол ин ҷангҳо идома доранд.
Поёни бенатиҷаи ин музокирот дар ҳоле сурат гирифта, ки наздик ба 5 моҳ аст артиши Исроил Ғаззаро аз чанд ҷиҳат, заминӣ ва ҳавоӣ бомборон дорад. Ба иттилои Вазорати беҳдошти Фаластни, аз шуруи ҷанг то ин муддарт наздик ба 31 ҳазор нафар, ки 70 дарасди онҳоро занону кӯдакон ташкил медиҳанд, кушта ва беш аз 70 ҳазор каси дигар ҳам захмӣ шудаанд.
