Путин бо имзои як қонун будубоши муҳоҷиронро мушкилтар кард

Владимир Путин, раисҷумҳури Русия бо имзои қонуне будубоши муҳоҷирон ва шаҳрвандони хориҷиеро, ки дар Русия зиндагӣ ва фаъолият мекунанд, мушкилтар кард.

Тибқи қоидаҳои нав, фарзандони муҳоҷирон баъди расидан ба синни 18-солагӣ вазифадоранд ё қаламрави Русияро тарк кунанд, ё агар нияти мондан дошта бошанд, мустақилона патенти корӣ гиранд.

Илова бар ин, муҳоҷирон муваззафанд худ ва ҳамаи аъзои хонаводаеро, ки таҳти сарпарастии онҳо қарор доранд, дар сатҳе на камтар аз ҳадди ақали зиндагии минтақае, ки дар он кор мекунанд, таъмин намоянд.

Тибқи қонуни нав муҳоҷир бояд исбот кунад, ки даромадаш барои худ ва кулли хонаводааш ҳадди ақали зиндагии муқарраршуда дар ҳамон минтақаро таъмин мекунад. Ба гуфтаи муаллифони қонун, ин талабот масъулияти иҷтимоии муҳоҷиронро нисбат ба фарзандон ва ҳамсаронашон бештар мекунад.

Хориҷиён муваззафанд барои ҳар кӯдаки ноболиғе, ки ҳамроҳи худ ба Русия меоранд, 50 дарсади маблағи асосии пардохти собити андоз аз даромади шахсони воқеӣ (НДФЛ) пардохта шавад.

Ин қонун фарзандони муҳоҷиронро муваззаф мекунад баъди ба синни балоғат расидан дар муҳлати 30 рӯз ё Русияро тарк кунанд, ё патенти кории мустақили худро гирифта, пардохти пурраи онро анҷом диҳанд.

Маълумот дар бораи даромади муҳоҷирон аз ҷониби Хадамоти федералии андоз ҳар се моҳ ба Вазорати корҳои дохилӣ ирсол мешавад. Дар сурати мавҷуд набудани даромади тасдиқшуда, ба муҳоҷир метавонанд аз додан ё тамдиди патент худдорӣ кунанд.

Иҷозати иқомати муваққатӣ (РВП) ё иҷозаи иқомати доимӣ (ВНЖ) метавонад бекор карда шавад, агар муҳоҷир дар як сол камтар аз 10 моҳ кор карда бошад ё даромадаш (ё маблағи пардохти собити патент) барои таъмини худ ва ҳар як узви хонаводааш ба сатҳи муқарраршуда нарасад.