Вазири корҳои дохилии Тоҷикистон Рамазон Раҳимзода 15-уми феврали соли ҷорӣ зимни нишасти матбуотӣ ба хабарнигорон гуфт, ки сатҳи ҷинояту ҷинояткорӣ дар Тоҷикистон нисбат ба солҳои гузашта камтар шудааст.
Раҳимзода зимни ироаи омори солонаи ниҳодаш гуфт, мақомоти Вазорати корҳои дохилии кишвар дар соли 2022 14612 ҷиноятро ошкор кардаанд, ки ин омор ба гуфтаи вазир, 82,3 дарсади ҷиноятҳои ошкоршуда мебошад.
Ҳамчунин Раҳимзода ишора кард, ки дар соли гузашта дар байни ҷиноятҳои ошкоршуда дар кишвар 23 ҳолати ҷинояти таҷовуз ба номус ба қайд гирифта шудааст, ки нисбат ба соли 2021-ум 2 ҳолат кам аст. Ӯ дар идома афзуд, ки “Ҷинояткорӣ сол ба сол кам шуда истодааст”.
Вазири корҳои дохилии кишвар дар нишасти матбуотӣ ба ҳодисаи қатли Абдуқаҳҳор Розиқов, ҷавони 37-солаи шаҳри Кӯлоб ишора карда гуфт, ки дар ин ҳодиса 3 корманди милиса “барои хунукназарӣ ҳангоми боздошти Абдуқаҳҳор Розиқов” боздошт шуда ва чанд нафари дигар низ аз кори мақомот ронда шуданд. Вале Раҳимзода дақиқ нагуфта, ки кормандони рондашуда оё дар робита ба қазияи Розиқов аз кор ихроҷ шудаанд ва ё бо дигар мақсад.
Ёдовар мешавем, ки шаби 2-юми январи соли ҷорӣ кормандони ШВКД-и шаҳри Кӯлоб сокини ин шаҳр Абдуқаҳҳор Розиқови 37-соларо аз хонаи истиқоматиаш боздошт карда, дертар ҷасадашро ба сардхонаи шаҳр супорида буданд.
Наздикону пайвандонаш дар суҳбат ба расонаҳо гуфта буданд, ки Розиқов дар натиҷаи шиканҷаи мақомот ба ҳалокат расидааст, ҷун дар баданаш осори шиканҷа дида мешуд.
Вазорати корҳои дохилии Тоҷикистон сабаби марги Абдуқаҳҳор Розиқовро истеъмоли зиёди “маводи сахттаъсири навъи амфетамин (кристалл)” гуфтааст, аммо наздиконаш инро рад мекунанд.
