Эмомалӣ Раҳмон имрӯз 23-юми феврал дар рӯзи таъсисёбии Қувваҳои мусаллаҳи Ҷумҳурии Тоҷикистон дар бораи тағйиру иловаҳо ба Қонуни хизмати ҳарбӣ гуфт. Дар ин сӯҳбаташ ӯ ҳамчунин хизмати пулакӣ дар ҳайати захиравиро шарҳ дод.
Раҳмон ҳадафи ворид намудани тағйиру иловаҳо ба Қонуни хизмати ҳарбиро ҳавасманд гардонидани шаҳрвандон барои хизмат дар сафи Қувваҳои мусаллаҳ ва дар ҳайати захираҳои сафарбарӣ барои мудофиаи давлат омода кардани шумораи бештари ҷавонон гуфт.
“Ҷорӣ гардидани намуди нави хизмати ҳарбӣ дар ҳайати захираҳои даъвати сафарбарӣ, дар навбати аввал, барои ба шаҳрвандони синни даъват омӯзонидани асосҳои умумии хизмати ҳарбӣ ва ба ҳайати захираҳои сафарбарӣ ворид кардани онҳо равона шудааст”.
Президент масъулини татбиқи ин қонунро вазифадор намуд, ки барои ташкили босифати маъракаи даъвати шаҳрвандон ба хизмати ҳарбӣ ва ҷалби ҷавонон барои хизмат дар сафҳои Артиши миллӣ тадбирҳои заруриро амалӣ намоянд.
Бар асоси қонуни нав, хизмати ҳарбӣ дар ҳайати захираҳои даъвати сафарбарӣ пешбинӣ шудааст, ки мувофиқи он шаҳрвандони синни даъват ба таври ихтиёрӣ бо гузаштани ҷамъомади якмоҳаи ҳарбӣ ва пардохти маблағи муайян, ки андозаи онро Ҳукумати Ҷумҳурии Тоҷикистон муқаррар менамояд, аз хизмати ҳарбӣ озод карда мешаванд.
Дар Тоҷикистон аз соли 1993 то ба имрӯз, рӯзи 23-юми феврал ҳамчуни рӯзи Қувваҳои мусаллаҳи ҶТ ҷашн гирифта мешавад. Ҳарчанд аз рӯзи таъсисёбии он 28 сол гузаштааст, вале шароити хизмат дар артиши ҶТ ҳамоно бад боқӣ мемонад.
Ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хизмат аз артиш мегурезанд ва мақомот бо тарзи маҷбурӣ ё облава ҷавононро ба артиш сафарбар мекунад, ки ин амали мақомдорон ҳамеша мавриди баҳс қарор гирифта буд.
