17.9 C
Dushanbe

Раҳмон: собиқ раиси шаҳри Кӯлоб ба 306 нафар ғайриқонунӣ замин фурӯхтааст

Юсуф Раҳмон, додситони кулли Тоҷикистон мегӯяд, Баҳром Иноятзода, собиқ раиси шаҳри Кӯлоб бо муовинаш ба 306 нафар ғайриқонунӣ замин фурӯхтааст. Дар ин бора “Sputnik” хабар дод.

Бино ба гуфтаи Юсуф Раҳмон, Баҳром Иноятзода, раиси собиқи шаҳри Кӯлоб ва муовини собиқи ӯ Ҳафизов бо маслиҳати пешакӣ бо гурӯҳи ҷинояткорон 128 гектар қитъаҳои заминро ба 306 шаҳрванд фурӯхтаанд.

Ҳаҷми маблағ аз фурӯши ғайриқонунии замин 725 ҳазор сомониро ташкил медиҳад. Худи Иноятзода ин иттиҳомотро бепоя хонда буд.

Гузориши Юсуф Раҳмон дар ин бора дар ҳолест, ки ахиран Прокуратураи генералии Тоҷикистон бо нашри як иттилоия гуфт, ки “Баҳром Иноятзода ҳангоми раиси шаҳри Кӯлоб будан, аз 13 нафар пора гирифта, маҳсулоти хайриявиро тасарруф карда, бо маблағҳои бадастовардааш, ба миқдори бештар аз 2 миллион сомонӣ Бунгоҳи тиббии шахсӣ сохтааст”.

Иттоҳоми дигаре, ки бар дӯши Иноятзода гузоштаанд, ин ғайриқонунӣ аз худ кардани ду манзил дар шаҳри Душанбе аст.

Дар идома гуфта шудааст, ки Иноятзода Б. аз соли 2015 инҷониб дар эъломияҳо оид ба вазъи амволии хизматчии давлатӣ ба ғайр аз даромадҳои маоши давлатӣ ба дастовардааш, дигар манбаъҳои даромад ва амволашро пинҳон доштааст.

Додгоҳ Иноятзодаро ба мӯҳлати 12 сол маҳрум сохтан аз озодӣ ва 5 сол маҳрум сохтан аз ҳаққи ишғоли мансабҳо равонаи зиндон кард.

Аммо худи Иноятзода ва наздиконаш дар додгоҳ ин ҳукмро ноодилона хонда, иттиҳомоти эълоншударо бепоя номиданд.

Ёдовар мешавем, ки рӯзи 20-уми ноябри соли 2020 додгоҳи минтақаи Кӯлоб, Баҳром Иноятзодаро бо моддаҳои 314 қ.2, 319 к.4, б. «а,в,г», 245 қ.2, б. «а,б,ғ», 247 қ.4, б. «б», 3381 К. 2, б. «в» , 262 қ.З, «б» КҶ ҶТ ба 12 соли зиндон маҳкум кард. Ӯро ба суистифода аз мансаб ва ҷиноятҳои дигар гунаҳкор донистанд.

Дилором Самиева ҳамсари Иноятзода гуфтааст, ки ба ҳукми додгоҳ розӣ нест, ба зинаҳои боло муроҷиат мекунанд ва айбномаҳое, ки нисбати Иноятзода эълон гардидааст, воқеият надорад.

Бино ба гуфтаи наздиконаш, Иноятзода 37 соли умри худро сарфи корҳои давлатӣ кард ва натиҷааш 12 сол паси панҷара будааст. Вале додраси парвандаи Иноятзода ҳангоми қироати ҳукм гуфт,  иттиҳомоти алайҳи Иноятзода эълоншуда тасдиқи худро ёфтаанд.

Баҳром Иноятзода ба ҳайси раиси шаҳри Истаравшан, вакили Маҷлиси Миллӣ фаъолият кардааст. То дастгир шуданаш дар курсии раиси шаҳри Кӯлоб менишаст.

Баҳром Иноятзода, раиси собиқи шаҳри Кӯлоб. Сурат: sugdnews.com

Замони Раиси шаҳри Истаравшан фаъолият карданаш, бо адешаҳои зидду нақизаш нисбати диндорон дар ҷомеа шинохта шуда буд. Ӯ он замон гуфта буд, нафароне, ки ба масҷид мераванд бо ақидаи солим берун намеоянд.

Моҳи июни соли 2020 аз ҷониби маъмурони амниятӣ боздошт шуд, бар асоси шаш моддаи қонуни ҷиноӣ, аз ҷумла суистифода аз ваколатҳои мансабӣ, гирифтани пора, аз они худ кардани молу мулки ба зимааш гузошташуда ва ғайриқонунӣ додани қитъаи замин муттаҳам шуд.

Иноятзода моҳи феврали соли 2019 моликони ширкати “Комил-2010”, мансуб ба писари Бег Сабур, раиси Хадамоти алоқа ва қудои президенти Тоҷикистонро танқид карда буд.

Ҳамчунин Бег Сабурро ба хотири пардохт накардани қарзҳои давлатӣ “Хоҷа Аҳрори Валӣ” хитоб намуд, ки аксари корбарон дар шабакаҳои иҷтимоӣ дастгир ва зиндонӣ шуданашро натиҷаи он танқиди сахташ аз қудои раисҷумҳур арзёбӣ карданд.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Сарвати пурасрор: Ҳамсари сарвазири Тоҷикистон дар Дубай қасрҳои боҳашамат харидааст

Сарвазири Тоҷикистон ва ҳамсараш ба суолҳо дар бораи он ки чӣ гуна тавонистааст дар кишвари худ ва Имороти Муттаҳидаи Арабӣ соҳиби амволи ғайриманқул шавад, посух надод.

Вазъи муҳоҷирони тоҷик дар Русия беҳтар мешавад?

Владимир Колоколтсев, вазири корҳои дохилии Русия дар пасманзари ҳодисаи хунин дар "Крокус" ба Тоҷикистон омад.

Баррасии масоили иқтисодии Тоҷикистону Туркия

Нишасти навбатии Комиссияи муштараки иқтисодии Тоҷикистон ва Туркия бо ҳузури намояндаҳои ду кишвар баргузор шуд.

Афзоиши шумори Қурбониёни ҳамлаҳои Исроил дар Ғазза

Субҳи рӯзи 28-уми май нерӯҳои исроилӣ урдугоҳҳои оварагон дар қисмати ғарбии шаҳри Рафаҳро ба шиддат бомборон карданд, ки дар натиҷа 16 нафар кушта ва даҳҳо каси дигар маҷруҳ шудаст.