Мақомоти Тоҷикистон бори дигар даст ба риштарошию сатргирии шаҳрвандони кишвар заданд.
Ба иттилои манобеи Azda tv, 30-уми апрели соли ҷорӣ мақомоти амниятӣ ва интизомии Душанбе дар кӯчаву мағозаҳо ва ҳатто дохили нақлиёти ҷамъиятӣ даромада, занони сатрпӯш ва мардони ришдорро бидуни фаҳмондан ва пешниҳоди қарору дастуре маҷбур кардаанд, ки сатрро аз сарашон бигиранд ва ришашонро битарошанд.
Як манбаъ ба шарти ифшо нашудани номаш рӯзи сешанбе дар тамос ба Azda tv гуфт, “имрӯз худам шоҳид будам, ки дар минтақаи 46-и пойтахт кормандони милиса ва дигар мақомот занҳои сатрдорро аз маршруткаҳо мефароранд ва маҷбур мекунанд сатрашро кашида, каме дуртар сатил дорнад, дар даруни он партоянд.”
Манбаъ афзуд, ки мақомоти интизомии кишвар занҳоро барои сатрҳояшон дашном карда, мегӯянд, “агар сатратро нагирӣ то 5 ҳазор сомонӣ ҷарима ва илова бар ин 15 рӯз зиндонӣ мешавӣ ва дар ниҳоят сатратро ҳам мегирӣ”.
То ҳол Azda tv натавонист ин иттилоъро аз манобеи расмӣ тасдиқ кунад. Вале таҷрибаҳои гузашта нишон додаанд, ки мақомоти кишвар чунин қарорҳоеро худ қабул мекунанд ва ба ҳеч расонае низ маълумоти дақиқ пешниҳод намекунанд ва сабаби чунин иқдомоти ғайри қонунияшонро шарҳ намедиҳанд.
Ба навиштаи бархе корбарон, баъд аз ҳодисаи хунини Маскав мақомоти Тоҷикистон низ мисли дигар кишварҳо фишорро болои шаҳрвандонаш бештар кардааст.
Azda tv аз тамоми хонандагон ва бинандагони гиромӣ хоҳиш мекунад, ки ҳар маълумоте дар ин бора дошта бошанд ва ё агар шоҳида чунин воқеаҳо шуданд, сабт карда, барои расонаӣ кардани он ба мо фиристанд, ҳувияти онҳо пинҳон мемонад.
