Ширкати “Газпром”-и Русия дар вокуниш ба бастаи ҷадиди таҳримҳои кишварҳои узви Иттиҳоди Арвупо интиқоли газ ба ширкати “Shell Energy”-и Олмонро ҳам қатъ кард.
Пеш аз ин ширкати “Газпром”-и Русия дар як иқдоми мушобеҳ интиқоли газро ба кишварҳои Лаҳистону Булғористон, Финляндияву Нидерландия ва Ҳоланд низ қатъ карда буд.
Иттиҳоди Аврупо, ки вобастаи нафту гази Русия аст ва алҳол кишварҳои узви ин иттиҳодия дар маҷмуъ ҳудуди 40 дарсад аз нафт ва наздик ба 25% гази худро аз Русия таъмин мекунанд, қасд дорад, то поёни соли ҷорӣ 90% аз воридоти нафти худро аз Русия қатъ кунад.
Пеш аз ин расонаҳои русӣ гузориш дода буданд, ки ширкати Газпроми Русия бо сабаби напардохтани ҳаққи истифодаи газ бо рубли русӣ интиқоли газ ба ширкати “GasTerra B.V.”-и Нидерландия ва ширкати Orsted-и Данияро низ қатъ кардааст.
Инчунин кишвари Ҳолланд ба фарқ аз дигар кишварҳои аврупоӣ, ки аз интиқоли гази Русия маҳрум шудаанд, яке аз истеҳсолкунандагони асосии газ дар Иттиҳоди Аврупост ва танҳо ҳудуди 5% аз ниёзҳои худро аз гази воридотӣ таъмин мекунад. Бо ин вуҷуд, ширкати “Газпром”-и Русия қабл аз он интиқоли газ ба ширкати “GasTerra“-и Ҳолландро низ боз дошта буд.
Қабалан Русия ба хотири дур задани шиддати таҳримҳои кишварҳои ғарбӣ ва наҷоти қурби рубли русӣ аз варшикастагӣ эълон карда буд, ки фурӯши газ ба кишварҳои “ғайри дӯст”-ро бо рубли русӣ ҷорӣ мекунад. Владимир Путин ҳам таъкид карда буд, ки ҳар кишваре, ки аз пардохти ҳаққи истифодаи гази кишвараш бо рубли русӣ сарпечӣ кунад, аз интиқоли газ маҳрум мешавад.
Гуфта мешавад, пас аз оғози ҳамлаҳои Русия ба Украина дар 24-уми февали соли ҷорӣ то кунун кишварҳои ғарбӣ чандин бастаи таҳримҳоро алайҳи Русия ҷорӣ карданд, то Маскавро водор кунанд аз идомаи ҳамалоти худ ба Киев даст бардорад, аммо ба назар мерасад, Русия дар ин рӯзу моҳҳои наздик қасди поён додани ҷанг дар ин кишварро надорад.
Ширкати “Газпром”-и Русия дар соли 2021 зиёда аз 2 триллион рубл даромад дошт. Қисми аз ин даромадҳояшро аз кишварҳои узви Иттиҳоди Аврупо ба даст оварда буд. Аммо тибқи оморҳои расмӣ танҳо дар чормоҳаи аввали соли ҷорӣ ҳудуди 27% аз ин интиқоли гази худ ба Иттиҳоди Аврупоро коҳиш додааст. Акунун ба назар мерасад то поёни семоҳаи дуввуми сол интиқоли гази содиротии Русия ба Иттиҳоди Аврупо нисбат ба соли гузашта камтар аз 50%-ро ташкил хоҳад дод.
