Вазорати корҳои дохилии Русия эълом кард, ки танҳо дар давраи гузашта тақрибан 60 ҳазор иҷозатномаи кор (патент)–и муҳоҷирони кориро беэътибор донистааст. Ба гуфтаи масъулони амниятии Русия, сабаби асосии ин иқдом риоя нашудани қоидаи нави сабти кор аз ҷониби муҳоҷирон мебошад.
Александр Гребёнкин, муовини котиби Шӯрои амнияти Русия изҳор доштааст, ки аз моҳи январи соли 2024 муҳоҷирон уҳдадоранд то ду моҳ пас аз гирифтани патент, гурӯҳҳои минтақавии Вазорати корҳои дохилиро аз ба кор қабул шудан ё ивази ҷойи кори худ огоҳ намоянд.
“Дар сурати иҷро нашудани ин талабот, патент беэътибор ҳисобида мешавад ва дигар ҳамчун асос барои иқомат дар Русия истифода шуда наметавонад”, – гуфтааст Александр Гребёнкин дар суҳбат бо Российская газета.
Ба гуфтаи Гребёнкин, ба Вазорати корҳои дохилӣ «ҳаққи қабули қарор дар бораи ихроҷи ҳарчи зудтар»-и муҳоҷироне дода шудааст, ки аз огоҳ кардани мақомот худдорӣ мекунанд. Ин ниҳод инчунин уҳдадор шудааст, ки дар бораи чунин ашхос маълумоти зарурӣ ҷамъ оварда, «аз воситаҳои муосири мониторинги электронӣ» истифода намояд.
Бояд зикр кард, ки аз 1-уми январи соли 2026 нархи патент дар аксар минтақаҳои Русия боло бурда мешавад. Дар умум, пардохти моҳонаи муҳоҷирон аз 8 900 рубл ба 10 000 рубл афзоиш меёбад.
Дар бархе минтақаҳо ин афзоиш назаррас буда, аз ҷумла дар Вилояти Тюмен: аз 9 385 → 11 471 рубл, Камчатка: аз 9 000 → 13 800 рубл ва Вилояти Иркутск: ба 12 000 рубл мерасад.
Мақомот ин тасмимро бо болоравии хароҷот ва зарурати «танзими вазъи меҳнатии хориҷиён» тавҷеҳ мекунанд.
Коршиносон мегӯянд, ки қатъ шудани даҳҳо ҳазор патент метавонад ба садҳо ҳазор муҳоҷири корӣ, хусусан аз Тоҷикистон, Узбекистон ва Қирғизистон таъсири ҷиддӣ расонад. Бисёре аз муҳоҷирон мегӯянд, ки қоидаҳои нав ва болоравии нарх барои онҳо ҳам аз ҷиҳати молӣ ва ҳам аз ҷиҳати ҳуҷҷатгузорӣ мушкилоти тоза ба вуҷуд меорад.
