Гурӯҳи вакилон аз ҳизби “Справедливая Россия – За правду” таҳти роҳбарии Сергей Миронов 9-уми сентябри соли ҷорӣ, ба Думаи давлатӣ лоиҳаи қонунеро пешниҳод намуданд, ки тибқи он ба аъзои оилаҳои муҳоҷирони корӣ вуруд ва иқомат дар ин кишвар манъ карда мешавад.
Дар ин лоиҳаи қонун танҳо шаҳрвандони Беларус истисно шудаанд. Дар сурати қабули ин қонун, он аз рӯзи нашри расмӣ ба қувваи амал медарояд.
Муаллифони лоиҳаи қонун қайд мекунанд, ки тадбири нав имкон медиҳад, бо маҳдуд кардани омадани аъзои оилаҳои муҳоҷирони корӣ ҷараёни муҳоҷират 15–20% коҳиш меёбад.
Ба гуфтаи онҳо, ин иқдом фишор ба инфрасохтори иҷтимоиро кам мекунад ва хароҷоти буҷаи кишваро барои маориф, тандурустӣ ва таъминоти иҷтимоӣ коҳиш медиҳад.
Сергей Миронов, раҳбари ҳизб дар шарҳи ин қонун гуфта, ки қабули қонун як қадами муҳим дар роҳи гузариш ба низоми “омад-кор кард-рафт” барои муҳоҷирон дар Русия мегардад.
Ҳизби “Справедливая Россия – За правду” муаллифи даҳҳо қонуни зидди муҳоҷирӣ буда, дар Думаи давлатии Русия барои маҳдуд сохтани фаъолияти муҳоҷирон дар ин кишвар телеграм-боти “Стоп мигрант” фаъол кардааст.
Ба иддаи муаллифони тарҳ, тариқи ин бот шаҳрвандон метавонанд дар бораи қонуншиканиҳои эҳтимолӣ аз ҷониби муҳоҷирон хабар диҳанд.
Ин ҳизб ҷонибдори ҷорӣ намудани низоми раводид бо кишварҳои Осиёи Марказӣ, манъи ҷалби муҳоҷирон ба соҳаҳои иҷтимоӣ, ба мисли сохтмон ва нақлиёт мебошад.
Ҳамзамон Сергей Миронов раҳбари ин ҳизб борҳо гуфта буд, ки танҳо муҳоҷироне бояд ба Русия роҳ дода шаванд, ки дорои маълумоти биометрӣ ва суғуртаи тиббии пулакӣ ҳастанд ва маблағи махсусе барои эҳтимоли ихроҷи муҳоҷирон аз онҳо пешакӣ ситонида шавад, то бо пули андози “русҳо” ин кор сурат нагирад.
