Рустами Эмомалӣ, Раиси Маҷлиси миллии Маҷлиси Олии Тоҷикистон бо мақомоти Русия масоили ҳамкориҳои дуҷонибаро баррасӣ кард.
Тавре расонаҳои Русия хабар медиҳанд, Рустами Эмомалӣ бо ҳадафи иштирок дар ҷаласаи 57-уми пленарии Ассамблеяи байнипарлумонии кишварҳои Иттиҳоди Давлатҳои Мустақил, ки имрӯз, 22-уми ноябр дар шаҳри Санкт-Петербурги Русия баргузор шуд, сафар карда буд.
Раиси шаҳри Душанбе зимни суханронияш дар ин нишаст “дар бораи нақши институти мушоҳидаи байналмилалии интихобот дар рушди демократия ва ҳифзи соҳибихтиёрии давлатии кишварҳои Иттиҳоди Давлатҳои Мустақил” суханронӣ кардааст.
Рустами Эмомалӣ “интихобот ва раъйпурсӣ”-ро “аз муҳимтарин унсурҳои ҳамкории сиёсиву ҳуқуқии байни кишварҳо” шуморида, таъкид карда, ки “нақши он дар такмили танзими ҳуқуқӣ ва заминаи қонунгузории миллии омодагӣ ва гузаронидани интихобот назаррас аст.”
Гуфта мешавад, шаҳрдори Душанбе дар ҳошияи ин нишаст бо раиси Шӯрои Федератсияи Маҷлиси Федералии Русия Валентина Матвиенко мулоқот карда, таъкид кардааст, ки ҳамкориҳои Тоҷикистону Русия дар ҷанбаҳои сиёсӣ, иқтисодӣ, тиҷоратӣ ва ғайра рушди устувор доранд.
Аммо маълум нест, ки Рустами Эмомалӣ бо мақомоти Русия масъалаи муҳоҷирон ва ҳалли мушкилоти онҳоро баррасӣ кардааст ё на. Чун ба гуфтаи таҳлилгарон, сафари мақомдорони тоҷик ба Русия муҳоҷирони тоҷикро каме ҳам бошад хушҳол месозад, зеро онҳо гумон мекунанд бо сафари мақомот мушкилоти онҳо низ дар миён гузошта мешавад ва ин ихроҷу боздоштҳо камтар мешаванд. Аммо дар расонаҳо гуфта нашудааст, ки Рустам дар ин бора бо мақомоти Русия чизе гуфта бошад.
Аз тарафи дигар, бархе таҳлилгарон бар ин назаранд, ки сухнронии Рустами Эмомалӣ дар Русия дар мавриди интихобот дар рушди демократия ва ҳифзи соҳибихтиёрии давлатии кишварҳои ИДМ баёнгари он аст, ки ба наздикӣ дар Тоҷикистон интиқоли қудрат сурат мегирад ва Рустам ҷои падарро хоҳад гирифт.
