Рӯзи 1-уми декабри соли ҷорӣ, бозори машҳури “Садовод” дар шаҳри Маскави Русия оташ гирифтааст.
Бино ба иттилои расонаҳои русӣ, ин оташ дар ҳоли ҳозир беш аз 600 метри квадратиро фаро гирифта, барои хомӯш кардани он 48 адад техника ва 170 сӯхторнишон ҷалб шудаанд.
Гуфта мешавад, наҷотдиҳандагон 350 нафарро аз ҷои ҳодиса берун баровардаанд, аммо ду нафари дигар аз дуди оташ масмум шудаанд.
Мақомот сабаби аслии сар задани сӯхторро муайян доранд, аммо гуфта мешавад, фурӯшандагон дар ин бозор аз лампа ва дигар асбобҳои электрикӣ доимо истифода мебурдаанд, ки метавонад расиши кӯтоҳи ноқили барқ боиси cӯхтор гашта бошад.
Бозори “Садовод” дар ҷанубу шарқи Маскав ҷойгир буда, масоҳаташ 40 гектарро ташкил медиҳад ва 9,5 ҳазор мағоза дорад.
Дар ин бозор муҳоҷирони корӣ, аз ҷумла шаҳрвандони Тоҷикистон кору фаъолият мекунанд.
Гуфта мешавад, ин дувумин сӯхтор аст, ки дар ҳафтаи ҷорӣ дар бозорҳои бузурги Русия сар мезанад.
30-уми ноябри соли ҷорӣ, дар бозори Темерник, ки аксар муҳоҷирони корӣ онҷо савдо мекунанд, сӯхтори шадид сар зад. Сӯхтор беш аз 4 ҳазор метри мураббаъро фаро гирифт ва танҳо пас аз 9 соат кормандони сӯхторнишонӣ тавонистанд оташро хомӯш кунанд.
