Дар шаш моҳи аввали соли 2026 дар Тоҷикистон 531 садамаи нақлиётӣ ба қайд гирифта шуда, бар асари онҳо 287 нафар ҷон бохта ва 508 нафари дигар ҷароҳат бардоштаанд. Дар ин бора намояндагони Вазорати корҳои дохилии Тоҷикистон рӯзи 21 июл зимни нишасти матбуотӣ хабар доданд.
Ба гуфтаи мақомот, дар муқоиса бо ҳамин давраи соли гузашта шумораи фавтидагон 8 нафар ва теъдоди захмиён 284 нафар зиёд шудааст.
Дар як моҳи охир низ чанд садамаи маргбор дар роҳҳои кишвар рух дод. Аз ҷумла, рӯзи 4 июл дар роҳи Фархор – Душанбе бар асари як садама 7 нафар ва рӯзи 2 июл дар шаҳри Ваҳдат 11 нафар ҷони худро аз даст доданд.
Коршиносон мегӯянд, афзоиши садамаҳои нақлиётӣ танҳо ба хатои ронандагон вобаста нест. Ба гуфтаи онҳо, фасод дар низоми додани шаҳодатномаи ронандагӣ, гирифтани шаҳодатнома тавассути пора, нодида гирифтани нуқсонҳои техникии мошинҳо ҳангоми муоина ва назорати нокифоя аз омилҳое мебошанд, ки метавонанд ба зиёд шудани чунин ҳодисаҳо мусоидат кунанд.
Ҳамчунин, суръати баланд, риоя накардани қоидаҳои ҳаракат, истифодаи мошинҳои куҳна, роҳҳои ноҳамвор ва таваҷҷуҳи нокифоя ба сатҳи омодагии ронандагон ҳангоми имтиҳонгирӣ аз ҷумлаи сабабҳои асосии садамаҳои нақлиётӣ арзёбӣ мешаванд.
Бо вуҷуди даъватҳои пайвастаи мақомоти масъул барои риояи қоидаҳои ҳаракат, омори расмӣ нишон медиҳад, ки садамаҳои роҳу нақлиёт ҳамоно аз мушкилоти ҷиддии амнияти роҳҳо дар Тоҷикистон боқӣ монда, ҳамасола боиси талафоти зиёди ҷонӣ ва осеб дидани садҳо нафар мешаванд
