Эмомалӣ Раҳмон, раисҷумҳури Тоҷикистон рӯзи 14-уми декабр бо ҳадафи ифтитоҳи чанд бинову иншооти давлатӣ ва ҷамъиятӣ роҳии вилояти Хатлон шуд.
Ӯ сафари худро аз шаҳри Левакант (собиқ шаҳри Сарбанд)-и вилояти Хатлон оғоз карда, дар ин шаҳр чанд бинову майдончаҳо, аз ҷумла бинои нави таълимии филиали Муассисаи давлатии “Донишгоҳи байналмилалии сайёҳӣ ва соҳибкории Тоҷикистон” дар вилояти Хатлонро ифтитоҳ кард. Гуфта мешавад, ин бино дорои 7 табақа буда, дар як баст то 2500 донишҷӯ таълим мегирад.
Эмомаӣ пас аз он ба ноҳияи Кӯшониён рафта, дар онҷо низ маркази тиҷоративу сардхонае барои нигоҳдории маҳсулоти кишоварзиро ифтитоҳ карда, баъдан аз чанд дегдону чакдонҳо дидан кард. Раҳмон сипас ба маркази вилояти Хатлон шаҳри Бохтар рафт.
Бино ба иттилои Хадамоти матбуоти Президент, Раҳмон дар шаҳри Бохтар “бинои воҳиди таъйиноти махсуси зиддитеррористии “Алфа”-и Раёсати Кумитаи давлатии амнияти миллӣ дар вилояти Хатлонро мавриди истифода қарор дод.”
Дар хабар гуфта нашудааст, ки ин бинои марбути КДАМ-и Тоҷикистон аз ҳисоби кӣ ва ё бо кадом буҷа сохта шудааст. Аксари бинову иншооти давлатӣ ва ғайридавлатие, ки пеш аз сафари Раҳмон сохта мешаванд, одатан аз ҳисоби мардуми оддӣ ва бахусус аз ҳисоби соҳибкорон аст.
Ба гуфтаи сокинон, мақомоти шаҳру ноҳияҳои кишвар пеш аз омадани Эмомалӣ Раҳмон соҳибкоронро маҷбур месозанд то дар ободии маконе саҳм гузоранд, аммо масъулон маблағи онро ҳатман аз буҷаи давлат ба ҳисоби шахсии худ масраф мекунанд. Чунин бинову корхонаҳои хурд баъд аз рафтани Эмомлаӣ ободии онҳо як моҳ ҳам тӯл намекашад ва ҳама ба харобазор табдил меёбад.
Аммо ҳеч ниҳод ва ё масъули давлате омода нест, ки бипурсад ин маблағҳои ҳангуфт ва масрафҳои беҷо аз ҳисоби кист ва омилони онро ба ҷавобгарӣ бикашад.
