Эмомалӣ Раҳмон дар раъси як ҳайати расмӣ барои иштирок дар маросими савангдёкунии Масъуд Пизишкиён ба Эрон рафтааст.
Бино ба иттилои расмӣ, 30-юми июли соли ҷорӣ Эмомалӣ Раҳмон, Президенти Тоҷикистон бо Алии Хоманаӣ, Раҳбари Инқилоби Ҷумҳурии исломии Эрон дар Теҳрон мулоқот кард.
Ба қавли манбаъ, дар рафти ин мулоқот ҷонибҳо дар бораи таҳким ва густариши робитаҳои дӯстӣ ва ҳамкории гуногунҷанбаи Тоҷикистону Эрон суҳбат карданд.
Инчунин Эмомалӣ Раҳмон дар ин сафар бо раисҷуиҳури Эрон Масъуди Пизишкиён дидор ва мулоқот кардааст. Зимни суҳбат ҳарду ҷониб аз вазъи кунунии ҳамкории дуҷониба, аз ҷумла дар бахшҳои сиёсӣ, иқтисодӣ, тиҷорат, энергетика, саноат, ҳамлу нақл, тандурустӣ, кишоварзӣ ва ғайра изҳори қаноатмандӣ карданд.
Ҷонибҳо панҷ маротиба афзоиш ёфтани доду гириф молу маҳсулот тайи солҳои ахирро нишонаи ҳамкориҳои судманди ду кишвар унвон карданд.
Гуфта мешавад, ҳарду ҷониб ба густариши ҳамкорӣ дар бахшҳои обу энергетика, нафту газ, технологияҳои муосир ва ҷалби сармоя ба ин самтҳо алоқамандӣ зоҳир карданд.
Ҳамчунин ҷонибҳо дар барои ҳамлу нақли молу маҳсулоти ду кишвар тавассути бандарҳои Бандар-Аббос ва Чобаҳор гуфтугӯ карданд.
Маросими савгандёдкунии Масъуд Пизишкиён, Президенти тозаинтихоби Эрон асри имрӯз бо ҳузури 70 ҳайати хориҷӣ иборат аз раҳбарони бархе кишварҳои минтақа, аз ҷумла раҳбарони кишварҳои Осиёи Марказӣ, раҳбарони ҳизбҳои сиёсӣ ва намояндагиҳои дипломатии муқими Теҳрон баргузор хоҳад шуд.
