Владимир Путин раисҷумҳури Русия дар як сафари аз қабл эълоннашуда аз шаҳри Мариуполи Украина, ки аз ҷониби нерӯҳои Русия тасхир шудааст, боздид кард.
Тавре хабаргузории ТАСС итттилоъ медиҳад, сафари раисиҷумҳури Русия ба Мариупол шаби 19-уми марти соли ҷорӣ сурат гирифтааст. Ҳадаф аз ин сафари эълоннашуда боздиди Путин аз Ситоди амалиёти вежаи низомӣ ва шинос шудан аз вазъияти ин ситод аз наздик будааст.
Гуфта мешавад, Путин бо шуморе аз сокинони ин шаҳр мулоқот кардааст. Аммо сухангӯи раисиҷумҳури Русия Дмитрий Песков ба хабарнигорон гуфт, ки “аслан дар нақша гирифта нашуда буд, ки Владимир Путин аз сокинони маҷмааи нави истиқоматӣ дар Мариупол боздид кунад.” Ба гуфтаи ӯ, нақша танҳо бозрасии маҷмааи истиқоматии Невский буд, вале баъдан худи Путин тасмим гирифта, ки баъзе иншоотҳоро тафтиш кунад.
Сафари Путин дар ҳоле ба шаҳри Мариуполи Украина сурат мегирад, ки Додгоҳи байнулмилалии ҷиноӣ рӯзи ҷумъа, 17-уми марти соли ҷорӣ, Путинро гунаҳкори ҷангӣ эълон карда, ӯро таҳти пайгард қарор дод.
Ин аз замони оғози ҳамлаҳои Путин ба ин кишвар, аввалин сафари ӯ ба хоки Украина ва заминҳои ишғолшудаи он тавассути нерӯҳои Русия мебошад.
