1-уми апрели соли 2024 дар Тоҷикистон “облава”-и ҷавонон ё сарбозшикор оғоз мешавад.
Эмомалӣ Раҳмон, раисҷумҳури Тоҷикистон 5-уми марти соли ҷорӣ фармони рухсати сарбозон ва даъвати баҳории ҷавонон ба хидмати ҳатмии ҳарбӣ дар кишварро имзо кард.
Тибқи ин фармон давоми моҳҳои апрел ва май ҷавонони солҳои таваллуди 1997-2006 ба хизмати ҳарбӣ даъват карда мешаванд.
Инчунин бар асоси ин фармон дар моҳҳои апрел-майи соли 2024 низомиёне, ки муҳлати муқарраршудаи хидмати ҳарбиро адо кардаанд, аз сафи Қувваҳои мусаллаҳ ба рухсатӣ фиристода мешаванд.
Бо вуҷуди оне, ки даъват ё ҷалби ҷавонон ба артиш аз 1-уми апрел оғоз мешавад, аммо дар баъзе минтақаҳо сокинон шикоят доранд, мақомот онҳоро маҷбур доранд то фарзандонашонро аз Русия оварда, ба артиш фиристанд.
Ёдовар мешавем, ки 29-уми январи соли 2021 Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” дар тарҳи нав қабул карда шуд.
Агар дар гузашта, шаҳрвандоне, ки донишгоҳу донишкадаҳоро бо кафедраҳои ҳарбӣ хатм менамуданд, аз хидмати ҳатмии ҳарбӣ озод буданд ва ба онҳо рутбаи афсари хурди таҳмовар (младший лейтенант) дода мешуд, аммо тибқи тарҳи нави қонун баъди 12 моҳи хидмати ҳарбӣ ба онҳо ин рутбаро медиҳанд.
Ҳамчунин тибқи ин қонун ҷавонон метавонанд бо пардохти беш аз 54 ҳазор сомонӣ аз хидмат озод шаванд.
Мавзуи ҷалби ҷавонон ба артиш дар Тоҷикистон солҳо боз доғ мемонад. Ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хидмат аз артиш мегурезанд ва мақомот бо тарзи маҷбурӣ ё “облава” дар хонаву кӯча ва ҳатто назди донишгоҳҳо ҷавононро ба артиш сафарбар мекунанд, ки ин амали мақомдорон ҳамеша дар ҷомеаи Тоҷикистон мавриди баҳс қарор дорад.
