Дар Тоҷикистон талош мешавад, ки шабакаҳои иҷтимоӣ барои кӯдакон ва наврасон маҳдуд карда шавад.
Дилноза Аҳмадзода, вакили Маҷлиси намояндагони Маҷлиси Олии Ҷумҳурии Тоҷикистон пешниҳод намуда, ки истифодаи шабакаҳои иҷтимоӣ барои кӯдакони то 14-сола пурра манъ карда шавад. Ин пешниҳод дар рӯзномаи “Народная газета” нашр шудааст.
Ба гуфтаи вакил, шабакаҳои иҷтимоӣ метавонанд ба рушди равонӣ ва ахлоқии кӯдакон таъсири манфӣ расонанд ва паҳншавии маълумоти бардурӯғ низ хатарзо аст. Ӯ таъкид мекунад, ки бо вуҷуди ворид шудани баъзе тағйирот ба Қонуни Ҷумҳурии Тоҷикистон “Дар бораи ҳифзи ҳуқуқи кӯдак”, назорат дар ин самт ҳанӯз нокифоя мебошад.
Аҳмадзода пешниҳод кардааст, ки истифодаи шабакаҳои иҷтимоӣ барои кӯдакони то 14-сола пурра манъ гардад. Барои наврасони аз 14 то 17-сола бошад, танҳо бо ризояти хаттии падару модар иҷозаи истифода аз чунин шабакаҳо дода шавад.
Ин пешниҳод вокунишҳои гуногунро дар ҷомеа ба бор оварда, ҳам ҷонибдорони ҳифзи ҳуқуқи кӯдакон ва ҳам мухолифони маҳдудияти озодиҳои шахсиро ба баҳс кашидааст.
