Додгоҳи вилояти Маскав шаҳрванди Тоҷикистон Шарифҷон Тиллозодаро бо иттиҳоми ҷосусӣ барои 14 сол равонаи зиндон кард.
Мурофиаи додгоҳии Шарифҷони 33-сола пушти дарҳои баста баргузор шуда, ҷузъиёти парванда ифшо нашудааст. Инчунин назари ӯ ва адвокату наздиконаш дар ин бора дастраси расонаҳо нагаштааст.
Ёдовар мешавем, мақомоти Русия ин муҳоҷири тоҷикро дар моҳи сентябри соли 2023 бо иттиҳоми ҷосусӣ барои Украина дастгир карда буданд.
Шарифҷон Тиллозода, ки зодаи шаҳри Панҷакенти Тоҷикистон аст, дар ҳудуди як қисми низомии баста боздошт шуда буд. Кормандони ин қисми низомӣ мегӯянд, дар аввал гумон карданд, ки ӯ мардикор асту роҳашро гум кардааст, вале, ба иддаои онҳо, баъдан маълум шудааст, ки “ӯ акс гирифта, ба кураторҳои худ ба хориҷ мефиристодааст”.
Маълум нест ӯ чӣ гуна тавонистааст, ки вориди як қисми низомии баста шавад, дар ҳоле, ки шаҳрвандонӣ хориҷӣ бе иҷозаи ФСБ ба чунин қисмҳои низомӣ ворид шуда наметавонад.
10-уми октябри соли 2023 додгоҳи ноҳияи Лефортово дар мурофиае, ки пушти дарҳои баста ӯро бар асоси моддаи 275 Кодекси ҷиноятии Русия ба ҷосусӣ айбдор намуда, ба муддати ду моҳ, яъне то 10 декабри соли ҷорӣ ба ҳабси пешакӣ гирифта буд, аммо то имрӯз аз сарнавишти ӯ чизе гуфта намешуд.
Мақомоти Тоҷикистон ҳам то ин дам дар бораи боздошту зиндонӣ шудани ин шаҳрвандаш чизе нагуфтааст.
Гуфта мешавад, Шарифҷон, ки дар шабакаҳои иҷтимоӣ фаъол буд, бештар аз худаш аксу видео мегузошт ва борҳо бо шиорҳои тарафдори аз Русия ва Путин дар саҳфаи фейсбукиаш акс нашр карда буд.
Пас аз ҷанги Русия ва Украина шумори нафароне, ки бо иттиҳоми хиёнат ба давлат ва ҷосусӣ дар Русия боздошт мешаванд бештар шудааст.
Танҳо дар нимсолаи аввали соли 2024 52 нафар бо иттиҳоми хиёнат ба давлат дар Русия зиндонӣ шудаанд, ки ин омор нисбат ба ҳамин давраи соли 2023 3,5 маротиба бештар аст. Инчунин дар шаш моҳи аввали соли ҷорӣ 18 нафар бо иттиҳоми ҷосусӣ маҳкум ба зиндон шудаанд, ки дар ҳамин давраи соли гузашта ҳамагӣ 2 нафар бо ин иттиҳом дастгир шуда буданд.
