Мулоқоти сарвазирони Тоҷикистон ва Узбекистон Коҳир Расулзода ва Абдулло Орипов рӯзи 24 апрел дар шаҳри Хуҷанд баргузор мешавад.
21 апрел ҳайати коршиносон, аз ҷумла намояндагони вазорату идораҳои дахлдори Узбекистон барои баррасӣ ва коркарди масъалаҳои ҳамкориҳои тиҷоративу иқтисодӣ, нақлиётӣ-коммуникатсионӣ ва обӣ- энергетикӣ, инчунин барои ҳамкорӣ дар соҳаҳои саноат ва кишоварзӣ ба Душанбе омаданд.
Тибқи иттилои Вазорати корҳои хориҷии Ҷумҳурии Тоҷикистон, натиҷаҳои кори коршиносон дар мулоқоти Сарвазири Тоҷикистон Расулзода ва Сарвазири Узбекистон Орипов рӯзи 24-уми дар шаҳри Хуҷанд баррасӣ хоҳад шуд.
Сарвазирони ду кишвар инчунин омодагиҳо ба сафари расмии Президенти Ҷумҳурии Узбекистон Шавкат Мирзиёев ба Ҷумҳурии Тоҷикистонро, ки дар нимаи аввали моҳи июни соли ҷорӣ ба нақша гирифта шудааст, баррасӣ мекунанд.
Аз ҷумла Сарвазирони ду кишвар санадҳоеро дида мебароянд, ки ҳангоми сафари Президенти Узбекистон ба Тоҷикистон ба имзо хоҳанд расид.