Амриддин Холмуродов, як паноҳҷӯи сиёсии тоҷик, ки чанде пеш дар Словакия боздошт шуда буд ва хатари истирдод ба Тоҷикистон ӯро таҳдид мекард, озод шудааст.
Холмуродов дар суҳбат бо Радиои Озодӣ гуфтааст: “Ман аз боздоштгоҳи Сечовтсе берун шудам. Мақомоти Словакия гуфтанд, бегуноҳият собит шуд, ту барои ҷомеа ҳеҷ хатаре надорӣ. Онҳо ҳамаи дархостҳо ва навиштаҳои ҷониби Тоҷикистонро тафтиш карда, ягон камбудӣ пайдо накарданд. Акнун дар наздиктарин фурсат ба зиндагии маъмулиам бармегардам.“
Гуфта мешавад, вай борҳо дар Словакия боздошт ва озод шудааст. Амриддин Холмуродов барои бепарвоӣ ба расидаги парвандаш рӯзи 10-уми августи имсол дар боздоштгоҳи Кошитсеи Словакия даст ба гуруснанишинӣ зада буд. Ба гуфтаи вай, баъд аз ин эътироз мақомоти додситонӣ пас аз бозпурсӣ ба ӯ ваъдаи тафтиши ҷиддии парвандаашро дода будаанд.
Ба иттилои манбаъ, ӯ дар гузашта низ чанд маротиба боздошт ва баъдан озод шуда буд. Аммо ин дафъа мақомоти Словакия ба Холмуродов ҳуҷҷати паноҳандагӣ додаанд ва ӯ ҳоло ҳаққи иқомати расмӣ дар кишварро дорад.
Амриддин Холмуродов, ки қаблан дар Киев зиндагӣ мекард, моҳи феврали 2022 ҳангоми убур аз сарҳади Украина ба Словакия бо дархости Душанбе боздошт шуд. Баъд аз ду сол раҳо шуд, вале ҳангоми убур аз Олмон дубора дастгир гардид. Мақомоти Словакия ӯро “шахси хатарнок ба амнияти кишвар” номида буданд. Аммо дар Тоҷикистон ӯро ба “барангехтани кинаю адовати динӣ, ташкили иттиҳоди ҷиноӣ ва даъват ба ифротгароӣ” муттаҳам мекунанд. Холмуродов қаблан дар шабакаҳои иҷтимоӣ сиёсати ҳукумати Тоҷикистонро танқид мекард.
