Сергей Собянин, шаҳрдори Маскав ғайримчашмдошт аз вуҷуди муҳоҷирони корӣ дар Русия ҳимоят кард.
Собянин дар пахши зиндаи яке аз шабакаҳои русӣ гуфт, ки муҳоҷиронро аксар онҳое интиқод мекунанд, ки худ омода нестанд кори вазнин, аз ҷумла тоза кардан, сохтмон ва дигар корҳои ҷисмиеро, ки кӯшиши зиёд мехоҳанд, иҷро кунанд.
Ӯ ба чунин коршиносони “норозӣ” машварат дод, ки бо маълумоти олӣ худашон ба даст ҷорӯб гирифта, кӯчаҳои Маскавро покиза кунанд.
Дар идома шаҳрдори Маскав таъкид кард, ки суханҳо дар бораи афзоиши шадиди шумораи муҳоҷирон асос надоранд. Ба гуфтаи Собянин аз соли 2018 шумораи коргарони хориҷӣ қариб тағйир наёфтааст. Камшавии муваққатӣ танҳо дар давраи пандемия мушоҳида шуда, пас аз он нишондиҳандаҳо ба ҳолати пештара баргаштанд.
Ӯ ҳамчунин аз коҳиши ҷинояткорӣ дар байни муҳоҷирон хабар дода, гуфт, ки ҷиноятҳои вазнин, аз ҷумла куштор ва дуздӣ дар солҳои охир чандин маротиба кам шудаанд.
Ҳамзамон Собянин таъкид карда, ки танҳо Маскав бо норасои ҷиддии коргар рӯ ба рӯ буда, тақрибан ним миллион коргар дар соҳаҳои гуногун намерасад ва бе муҳоҷирон иҷро кардани тамоми ҳаҷми кори пойтахт ғайриимкон аст.
Ҳимоят аз кори муҳоҷирон дар ҳоле аз забони шаҳрдори Маскав садо медиҳад, ки дар Русия сиёсатмадорони миллатгаро фазои муҳоҷирбадбиниро ба вуҷуд оварда, бо пешниҳоду қабули қонунҳои нав дар Думаи давлатӣ талош доранд кор ва шумораи онҳоро маҳдуд кунанд.
Ҳатто гурӯҳе аз сиёсатмадорони рус пешниҳод доранд, ки бо кишварҳои Осиёи Марказӣ, ки муҳоҷирон аз ин кишварҳо аксар корҳои сахт дар Русияро иҷро мекунанд, виза ҷорӣ карда шавад.
