Созмони Милалали Муттаҳид бори дигар аз мақомоти Тоҷикистон озодии хабарнигорони зиндониро талаб кард.
Гузоришгари вежаи Созмони Милали Муттаҳид Мери Лолор дар мулоқот бо намояндаи Тоҷикистон дар ин созмон Ҷонибек Ҳикмат Исмоил масъалаи озод кардани ҳомиёни ҳуқуқ ва рӯзноманигорони зиндониро дар миён гузоштааст.
Мулоқоти гузоришгари вежа дар умури ҳуқуқи одамон бо намояндаи доимии Тоҷикистон дар Созмони Милали Муттаҳид рӯзи 24-уми октябр дар Ню-Йорк гузаштааст.
Хонум Лолор дар бораи ин мулоқот дар саҳфаи X (собиқ твиттер) навиштааст, ки “бори дигар даъвати худро барои раҳоии ҳомиёни ҳуқуқ ва хабарнигорони зиндонӣ, аз ҷумла Далери Имомалӣ, Абдулло Ғурбатӣ ва Улфатхоним Мамадшоева такрор кардам”.
Инчунин Мэри Лолор, гузоришгари вежаи СММ дар моҳи декабри соли гузашта бо Далери Имомалӣ ва Абдуллоҳ Ғурбатӣ дар зиндон мулоқот карда гуфта буд, ки ин ду рӯзноманигор, бахусус Далери Имомалӣ бояд аз ташхиси сил гузаранд.
Гуфта мешавад, дар бештар аз як соли охир мақомоти кишвар чанд тан аз рӯзноманигорону блогерони шинохта, аз ҷумла Далери Имомалӣ, Абдуллоҳи Ғурбатӣ, Завқибек Саидаминӣ, Абусаттор Пирмуҳаммадзода, Муҳаммади Султон, Улфатхоним Мамадшоева, Хуршед Фозилов, Хушом Ғулом ва дигаронро бо иттиҳомоти сохта равонаи зиндон карданд.
Созмонҳои ҳомии ҳуқуқ борҳо аз мақомоти Тоҷикистон раҳоии онҳоро талаб кардаанд, аммо Тоҷикистон мисли ҳамеша тавсия ва талаби созмонҳоро нодида мегирад.
Саркӯби рӯзноманагирон, блогерон ва фаъолони маданӣ дар кишвар боис гаштааст, ки Тоҷикистон дар Шохиси озодии матбуот поёнтар аз Афғонистон, ки онҷо зимоми қудратро Толибон дар даст доранд, қарор бигирад.
