Икром Субҳонзода, директори Агентии авиатсияи граждании Ҷумҳурии Тоҷикистон дар нишасти матбуотии ниҳодаш гуфт, ки бо дархости онҳо ширкати “Сомон Эйр” розӣ шуд нархи чиптаҳоро 30 дарсад поин оварад.
Субҳонзода дар ин нишасти матбуотие, ки дирӯз 15 феврал баргузор шуд, таъкид намуда, ки мо аз ширкати “Сомон Эйр” дархост кардем, ки нархномаҳоро бозбинӣ кунад, то ки арзиши билетҳо поин бурда шавад.
“Раҳбарияти “Сомон Эйр” тарифҳоро бозбинӣ намуда, сар аз моҳи декабри соли гузашта, ширкат арзиши билетҳоро аз 39-40 ҳазор рубл то ба 26-27 ҳазор рубл, яъне тақрибан ба андозаи 30% кам кард”, гуфт, Икром Субҳонзода, директори Агентии авиатсияи граждании Ҷумҳурии Тоҷикистон.
Дархости ин ниҳод барои поин овардани арзиши чиптаҳои парвоз танҳо аз “Сомон Эйр” набуда, ҳамзмаон дар ин нишаст Субҳонзода иброз дошта, ки онҳо аз ширкатҳои хориҷӣ, аз ҷумла “Turkish Airlines” низ чунин дархостро кардаанд.
Субҳонзода таъкид кард, ки “Масалан, “Turkish Airlines” моҳи феврал арзиши билетҳоро ба хатсайри Душанбе-Истанбул ба андозаи 25-35% поин бурд”.
Мсаъалаҳои дигаре, ки дар нишаст аз забони ин масъули тоҷик садо дод ин барқарор намудани парвозҳои мунтазам бо кишварҳои Русия ва Чин мебошад. Субҳонзода мегӯяд, гуфтушунидҳо дар мавриди барқарор шудани парвозҳои мунтазам ба Русия ва Чин идома доранд.
“Чанде пеш дар Русия оид ба барқарор намудани парвозҳои мунтазам гуфтушунид доштем. Тоҷикистон ба барқарор кардани парвозҳои мунтазама аз 1 июн омода аст. Ин масъала ба вазъи эпидемиологӣ вобаста мебошад. Мувофиқи маълумоти Вазорати тандурустӣ, дар ҷумҳурӣ дигар ҳолатҳои гирифторӣ ба коронавирусу фавт аз он ба қайд гирифта намешавад. Ҷониби Русия ин масъаларо меомӯзад ва ҳалли масъала ба онҳо вобаста аст”.
Бо вуҷуди он ки Русия парвозҳои мунтазамро бо Қазоқистону Қирғизистон барқарор карда аст, аммо барои барқарор намудани парвозҳо бо Тоҷикистон шитоб намекунад.
Ин ҳам дар ҳолест, ки масъулон дар Тоҷикистон ва ҳатто расиҷмуҳур таъкид дорад, ки кишвар холӣ аз вируси корона аст, аммо Русия гуфта, чунин тасмимеро танҳо пас аз арзёбии вазъи эпидемиологӣ, марбут ба COVID-19 дар Тоҷикистон мегирад.
Дар пайи дархости сарвазир Қоҳир Расулзода дар сафари ахираш ба Маскав барои барқарор кардани парвозҳои мунтазам масъулони рус гуфтанд, онҳо дар ибтидо гурӯҳеро аз Русия барои арзёбии вазъи эпидемиологӣ ба Тоҷикистон мефиристанд. Танҳо пас аз ин дар масъалаи ифтитоҳи парвозҳои мунтазам фикр хоҳанд кард.
Масъалаи поин овардани нархи чиптаҳо дар Тоҷикистон аз забони масъулон замоне садо медиҳад, ки пас аз моҳи марти соли гузашта Русия дар пайи интишори пандемия марзҳояшро баст, муҳоҷирон маҷубр буданд тариқи танҳо парвозҳои чартерӣ ва бо гаронтарин нархи чиптаҳо дар минтақа ба ватан баргарданд.
Бисёре аз муҳоҷирон гуфтанд, онҳо дар пайи аз даст додани корашон маҷбур шуданд ба ватан баргарданд, илова бар ин ширкати “Сомон Эйр” бо нархи хеле гарон чипатҳоро фурӯхт, ки бе ин ҳам ба ҷайби зарардидаи муҳоҷир боз зарари изофӣ ворид кард.
Аз моҳи март ба ин сӯ хоҳишмандони бозгашт ба Ватан аввал худро бояд дар намояндагиҳои расмии кишвар сабтином мекарданд ва танҳо пас аз расидани навбат метавонитсанд ҳамон билети гаронро бихаранд. Ин боис шуда буд муҳоҷирон дар назди сафорат соатҳо навбатпоӣ бикунанд ё аз миёнаравҳое, ки ба қавли муҳоҷирон бо сафорат ҳамкорӣ доштанд бо нархи гарон билет бихаранд.
Икром Субҳонзода дар он замон нархи билети бозгашт аз Русия ба Тоҷикистонро тавассути ҳавопаймоҳои “Сомон Эйр” расман 395 евро гуфта буд. Аммо муҳоҷирон пайваста шикоят доштанд, ки аксаран билетҳоро аз нархи расмиаш ба маротиб гаронтар мефурӯшанд.
Намояндаҳои ширкатҳои ҳавопаймоӣ дар Тоҷикистон сабаби гаронии нархи чиптаро дар он гуфта буданд, ки ҳавопаймоҳо аз Душанбе ба шаҳрҳои Русия холӣ рафта, аз он ҷо шаҳрвандонро меоранд, аз ин рӯ нархи билету хадамот 40 дарсад бештар мешавад.
Ин дар ҳолест, ки нархи билети парвоз аз Русия ба Қирғизистон ду баробар арзонтар аст. Ва кишварҳое ҳам барои овардани шаҳрвандонашон чанд дафъа ҳавопамову қатора фиристодаанд то ройгон онҳоро ба ватанашон бозгардонанд. Бо сабаби арзонии парвозҳо аз тариқи Қирғизистон зиёде аз муҳоҷирони тоҷик роҳи бозагазташонро аз ҳамин масир ба ватан пеш гирифтанд.
Огаҳони умур мегӯняд, тасмими масъулон барои поин овардани нархҳо шояд бо дарки ҳамин вазъ бошад, ки дигар муҳоҷирон парвоз аз тариқи дигар кишварҳоро авлотар медонанд, аз ҷумла тариқи ҳамсоякишварҳо.
Муҳоҷирон мегӯянд, агар билети парвоз аз “Сомон Эйр” 37-40 ҳазори русӣ бошад, бо дигар тариқ 19-20 ҳазор то расидан ба хонаҳояшон масраф мекунанд, ки ин як баробар ба фоидаи муҳоҷирони тоҷик мебошад.
Вақтҳои ахир шикоятҳо аз хидматрасонии “Сомон Эйр” низ чанд дафъа дар расонаҳо роҳ ётфтанд, ки муҳоҷирон аз хӯроки пешниҳод кардаи ин ширкат ба муштариёнаш интиқод мекарданд, чун ба гуфти онҳо хеле каму нокифоя буд.
