Таъкиди Тоҷикистону Эрон барои пурра ба итмом расонидани корҳои сохтмонӣ дар нақби Истиқлол

Тоҷикистон ва Эрон бори дигар дар бораи пурра ба анҷом расонидани корҳои сохтмонӣ дар нақби автомобилии “Истиқлол” гуфтугӯ карданд.

Пештар аз ин нахустин ҷаласаи Гурӯҳи дӯстӣ ва ҳамкории парлумонҳои Тоҷикистону Эрон дар шакли видеоконфронс баргузор шуд.

Зимни мулоқоти онлайнӣ қайд карда шуд, ки ба итмом расонидани нақби “Истиқлол” авлавият дар ҳамкориҳои ду кишвар мебошад.

Дар ин мулоқот гуфта шудааст, ки пас аз ба имзо расидани созишнома дар бораи ба анҷом расонидан ва беҳбуди нақби Истиқлол дар 20 январи соли 2021, кор дар нақб барои насби системаи ҳаво, равшанӣ ва бехатарии сӯхтор идома дорад. Ин корҳо то таҷлили 30-умин солгарди Истиқлолияти давлатии Тоҷикистон (сентябри 2021) анҷом хоҳанд ёфт.

Ёдовар мешавем, ки сохтмони нақби Истиқлол моҳи сентябри соли 2003 аз ҷониби ширкати эронии “Собир” оғоз шуда буд. Эрон барои иҷрои ин тарҳ 31 миллион доллар ҷудо кардаа буд, ки аз он 10 миллион доллар ҳамчун грант ва 21 миллион доллар ҳамчун қарз. Ҳукумати Тоҷикистон 7,8 миллион доллар ҷудо кардааст.

Нақби Истиқлол дар 80-километрии шимоли Душанбе байни Душанбе ва Хуҷанд ҷойгир аст. Дарозии нақб 5,2 км мебошад. Он иртибот байни минтақаҳои шимол ва ҷануби Тоҷикистонро таъмин менамояд.