Шоми душанбе, 10-уми ноябри соли 2025, дар назди Қалъаи Сурх (Red Fort) дар шаҳри Деҳлӣ таркиши шадид рух дод, ки бар асари он ҳадди ақал 10 нафар кушта ва зиёда аз 30 нафар захмӣ шуданд.
Пулиси Деҳлӣ гуфтааст, ки таркиш ҳангоми ҳаракати як мошини сабук, ки дар назди чароғаки роҳ бо суръати паст ҳаракат мекард, ба амал омадааст. Вақте ки чароғи сурх фурӯзон шуд, мошин истод ва чанд сония пас мунфаҷир гардид. Дар натиҷа, мошинҳои атроф низ сахт осеб диданд.
Ба иттилои манбаъҳои амниятӣ, таҳқиқот тибқи қонуни сахти зиддитеррористии Ҳинд (UAPA) оғоз шудааст. Пулис ҳоло чор гумонбарро боздошт карда, гуфтааст, ки эҳтимол ин ҳодиса бо гурӯҳи Jaish-e-Mohammed иртибот дошта бошад.
Нарендра Модӣ, нахуствазири Ҳиндустон, ки дар сафари расмӣ дар Бутан қарор дорад, изҳор намуда, ки “омилони ин амали террористӣ ҳатман пайдо ва ба додгоҳ супурда хоҳанд шуд.”
Қалъаи Сурх, яке аз ёдгориҳои муҳими таърихии асри XVII (17-ум) ба шумор рафта, ҳар сол ҳазорҳо сайёҳ барои тамошои он ба Ҳиндустон мераванд. Пас аз ҳодисаи мазкур, ин минтақа пурра баста шуда, гурӯҳҳои махсуси амниятӣ ва коршиносони маводи тарканда ба ҷои ҳодиса фиристода шудаанд.
