Аҳмад Масъуд, писари Аҳмадшоҳ Масъуд бо шумули иддае аз чеҳараҳои сиёсии Афғонистон аз таъсиси эътилофи зидди толибонӣ хабар доданд.
Ин чеҳраҳои ҷиҳодӣ ва сиёсии Афғонистон эътилоферо бо номи “Шӯрои олии муқовимат барои наҷоти Афғонистон” таъсис додаанд.
Дар ин эътилоф аз чеҳраҳои саршиноси Афғонистон ба монанди Аҳмад Масъуд, писари Аҳмадшоҳ Масъуд, Муҳаммад Исмоилхон, Ато Муҳаммаднур, Абдурашид Дӯстум, Муҳаммадюнус Қонунӣ ва дигарон ширкат кардаанд.
Гуфта мешавад, яке аз ҳадафҳои аслии ин шӯро ташкили ҳукумати ҳамашумул бо мушорикати тамоми ақвом дар Афғонистон ва баргузории интихоботи озоду шаффоф аст.
Аҳмад Масъуд дар ин нишаст гуфт, ки ҳадафи онҳо талош бо таъсиси ин эътилоф барои инсиҷоми ҳама гурӯҳҳои зидди толибонӣ аст, то барои бунбасти Афғонистон роҳҳалҳое пайдо кунанд.
Ин дар ҳолест, ки Толибон имрӯз душанбе, 15-уми августро ба муносибати рӯзи ба қудрат расиданашон дар Афғонистон рӯзи истироҳат эълон карда, ин рӯзро “озодии Афғонистон аз зери истеъмори Амрико” ном ниҳодаанд.
Аммо мухолифони ҳукумати Толибон ин озодиро зери суол бурда, фақри шадиду бекорӣ ва маҳви расонаву озодии баёнро мисол меоранд.