Ҷамъе аз фаъолон ва мухолифони тоҷик аз мақомоти Туркия хостанд, ки Cуҳроби Зафар, раҳбари “Гурӯҳи 24” ва Насим Шарифов, намояндаи ин ҳаракат дар Туркияро озод кунанд ва ба “душман” насупоранд.
Имрӯз, 14-уми март аъзои Ҳарати сиёсии “Гурӯҳи 24” дар назди бинои Консулгарии Туркия дар шаҳри Ҳурти кишвари Олмон тазоҳурот ташкил карданд.
Тазоҳуркунандагон дар даст шиору дархостҳои мухталифе бо аксҳои Cуҳроби Зафар, раҳбари “Гурӯҳи 24” ва Насим Шарифов, намояндаи ин ҳарактар дар Туркияро доштанд ва аз мақомоти кишвари Туркия талаб карданд, ки ин мухолифонро ба Тоҷикистон ихроҷ накунанд.
Аз ҷумла, дар аксу шиорҳо дар муроҷиат ба мақомоти Туркия навишта шудааст, ки “Аз шумо фақат интизори адолатро дорем”, “Оё бо касоне, ки аз шумо паноҳгоҳ талаб мекунанд, ҳамин тавр рафтор мекунед?”, “Ҳамкорӣ бо золимон хиёнат ба мазлум аст”, “Суҳроб Зафар ва Насим Шарифовро озод кунед. Бародаронатонро таслими душман накунед” ва ғайра.
Инчунин фаъолон ва аъзои “Гурӯҳи 24” дар ин тазоҳурот гуфтанд, ки мақомоти Туркия набояд иҷоза бидиҳанд ҳодисае, ки болои даҳҳо фаъоли истирдодшуда омад, яъне шиканҷаву зиндон дар Тоҷикистон боз бо Суҳроби Зафар ва Насим Шарифов такрор шавад.
Гуфта мешавад, тазоҳуроти навбатӣ барои озодии ин ду фаъоли сиёсӣ фардо, 15-уми март аз соати 10:00 то 13:00 дар назди бинои сафорати Туркия дар Венаи Утриш баргузор мегардад.
Ёдовар мешавем, ки ҳамагуна тамос бо Суҳроб Зафар, раҳбари Ҳаракати сиёсии “Гурӯҳи 24” аз 10-уми марти соли ҷорӣ ба ин тараф ва тамосҳо бо Насим Шарипов, намояндаи ин гурӯҳ дар Туркия аз 23-уми феврали соли ҷорӣ ба ин сӯ қатъ шудааст. Ҳардуи онҳо дар Туркия – кишваре, ки соли 2015 раҳбари ин гурӯҳ Умаралӣ Қувватов ба қатл расида буд, беному нишон гаштаанд.