Эътирозгарони Гурҷистон дар ду рӯз тавонистанд мақомоти ин кишварро маҷбур созанд, ки қонуни “агентҳои хориҷи”-ро, ки ҳизби ҳоким аз он пуштибонӣ мекард, бекор кунад.
Ҳизби ҳокими Гурҷистон “Орзуи Гурҷистон” ва ҳаракати “Нерӯи мардум” қонуни баҳсбарангези “агентҳои хориҷи”-ро, ки боиси эътирозҳои оммавӣ дар Тбилиси ва дигар шаҳрҳои ин кишвар шуда буд, пас аз қабули он дар хониши аввал, лағв мекунад.
Муаллифони қонуни баҳсбарангези “агентҳои хориҷӣ” рӯзи панҷшанеб, 9-уми март баъд аз ду рӯзи эътирози сокинони ин кишвар сухани онҳоро бишнаванд. Онҳо бо нашри изҳороте эътироф карданд, ки лоиҳаи қонуни пешниҳод кардаашон дар ҷомеа ихтилофи назарро ба вуҷуд овардааст. Ва аз ин сабаб аз пешниҳоди он даст мекашанд.
Аммо, ба иддаои онҳо, қонун тобеи русӣ набуда, “дастгоҳи дурӯғпарокан” тавонист, ки лоиҳаи қонунро ба таври манфӣ муаррифӣ карда, як қисми муайяни мардумро ба иштибоҳ андозад. Дар ин лоиҳа тамғаи дурӯғи “қонуни Русия” часпонида шуд”.
Ҳизби ҳокими “Орзуи Гурҷистон” дар ин тазоҳурот бархе “нерӯҳои радикалӣ”-ро гунаҳкор дониста, маъмурони пулисеро, ки эътирозгаронро бо мошинҳои обпош пароканда карда, алайҳи онҳо аз гази ашковар ва ғайра истифода карданд, “қаҳрамононе” номида шуданд, ки “ба хушунат дар сатҳи олӣ посух доданд”.
Дар изҳорот омадааст, ки “Бо дарназардошти ҳамаи гуфтаҳои боло, мо ҳамчун як ҳукумати масъул дар назди ҳар як узви ҷомеа тасмим гирифтем, ки лоиҳаи қонунеро, ки ҷонибдорӣ мекардем, бечунучаро бозпас гирем”.
Ҳизби ҳокими “Орзуи Гурҷистон” афзуд, ки онҳо пас аз рафъи ҳолати эҳсосотии мардум бо аҳолӣ дар бораи аҳамияти ин лоиҳа суҳбат хоҳанд кард.
Намояндагии Иттиҳодияи Аврупо дар Гурҷистон аз тасмим дар бораи бозпас гирифтани тарҳи қонуни мазкур истиқбол кард. Ӯ мегӯяд, “мо аз тамоми раҳбарони сиёсии Гурҷистон даъват мекунем, ки ислоҳотро ба таври фарогир ва созанда тибқи 12 авлавият аз сар бигиранд, то Гурҷистон мақоми номзади Иттиҳоди Аврупоро ба даст орад”.
Ёдовар мешавем, шаби 7-уми марти соли ҷорӣ ҳазорон нафар аз шаҳрвандони Гурҷистон ба хиёбонҳои шаҳри Тбилиси баромада даст ба гирдиҳамоиҳои эътирозӣ заданд.
Эътирозҳои оммавии шаҳрвандони Гурҷистон баъд аз он сар зад, ки парлумони ин кишвар аз тарҳи қонун “Дар бораи агентҳои хориҷӣ” пуштибонӣ кард.
Гуфта мешавад, дар пайи ин эътирозҳо миёни нирӯҳои амниятӣ ва эътирозгарон задухӯрд сар зад, ки даҳҳо нафар захмӣ гашт. Инчунин даҳҳо нафари дигар, аз ҷумла чанд тан аз раҳбарони мухолифон аз ҷониби мақомот боздошт шуданд.
Эътирозгарон гуфта буданд, ки бо қабули ин қонун нафарони зиёде бо ин баҳона зиндонӣ мешаванд, чӣ гунае ки Русия даҳ сол боз барои саркӯби мухолифони худ аз он истифода мекунад.
Инчунин, ба гуфтаи мухолифон, ин иқдом ба маҳдуд кардани фаъолияти ҳомиёни ҳуқуқ ва матбуот равона шуда, зидди ворид шудани ин кишвар ба ИА тарҳрезӣ шудааст.
Гуфта мешавад, ба ин монанд дар Русия соли 2012 қонуне низ қабул шуда буд, ки то имрӯз барои саркӯби мухолифон аз он суиистифода мешавад.
