Тилек Токтогазиев: аз Қирғизистон ба Тоҷикистон ғайриқонунӣ чорво мебаранд

Сурат: kaktus.media аз Твиттер

Тилек Токтогазиев, вазири кишоварзии Қирғизистон зимни ҷаласаи парлумон изҳор доштааст, ки сарфи назар аз маҳдудияти содироти чорво аз Қирғизистон онро тариқи қочоқ ҳанӯз ҳам ба Тоҷикистону Узбекистон интиқол медиҳанд.

Бино ба иттилои “Sputnik” Вазири кишоварзӣ таъкид намудааст, ки чорво аз кишвар чун моли гӯё белорусӣ тариқи қочоқ содир мегардад.

Ӯ аз боздиди гуруҳи корӣ аз гузаргоҳи марзии “Сосновка” нақл кардааст:

“Тайи як соат ду мошини калони боркаш аз марз гузаштанд, ки ҳар якашон 30 сар чорво доштанд. Ними чорво бидуни тамға буданд”.

Дар идома Токтогазиев гуфтааст, чорворо гӯё аз Белорус овардаанд, аммо ҳуҷҷатҳо хеле шубҳабарангез буданд, бояд мақомоти дахлдор ба таҳқиқи чунин ҳолатҳо машғул шаванду аз қочоқ ҷилавгирӣ намоянд.

Вале то ҳол дар ин маврид назари ҷониби Тоҷикистон дар бораи ворид гардидани қочоқ аз кишвари Белорусия дастрас нест.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.