Вазорати корҳои хориҷаи Тоҷикистон дар як изҳороте оташ задани китоби муқаддаси мусалмонон Қуръони Каримро дар Дания ва Шветсия маҳкум кард.
Вазорат сӯзонидани Қуръони Каримро таҳқири мусалмонони ҷаҳон номида, гуфтааст, ки он боиси эҷоди ихтилоф дар ҷомеа ва баҳонае барои низоъҳои байнимазҳабӣ мешавад.
Инчунин вазорат таъкид кардааст, ки “Тоҷикистон ҳамеша тарафдори муколамаи созандаи байни тамаддунҳо буда, ҳар навъ зуҳури таҳаммулнопазирӣ, ифротгароӣ ва терроризм, хусумат ва ҷангу низоъро маҳкум мекунад”.
Вазорати корҳои хориҷӣ дар ҳоле қуръонсӯзиро дар кишварҳои аврупоӣ маҳкум кардааст, ки чанде пеш Тоҷикистон дар радабандиҳои созмонҳои байналмилалӣ яке аз кишварҳои ноозоди дунё шуморида шуда, дар масъалаи нақзи ҳуқуқи диндорон мавриди интиқод қарор гирифта буд. Тибқи гузоришҳои ин созмонҳо, мақомоти Тоҷикистон алайҳи диндорон, ба хусус занони ҳиҷобпӯшу мардони ришдор ва рафтани ҷавонон ба масҷиду Ҳаҷ маҳдудиятҳои зиёд ҷорӣ карда, як фазои тарсеро дар байни ин қишри ҷомеа ба вуҷуд овардаанд.
Ёдовар мешавем, ки рӯзи 28-уми июни соли ҷорӣ, ки рӯзи аввали Иди Қурбон буд, марди ироқитабор бо номи Силвон Мумико дар муқобили масҷиди бузурги Стокҳолм дар Суед Қуръони Каримро оташ зад. Ин амали ӯ хашми мусалмонони саросари дунёро барангехт ва амали ӯро маҳкум карданд. Инчунин аз кишвари Суед хостанд ба чунин иқдомоти таҳрикомез иҷозат надиҳад, чун ин иқдомро наметавон озодии баёну андеша номид.
Мумико дубора рӯзи 20-уми июл дар пайи як тазоҳуроте дар назди сафорати Ироқ дар Стокҳолм китоби “Қуръон”-ро зери по кард, вале ин бор оташ назад.
Дар пайи сӯзондани Қуръон ҳазорҳо нафар дар Покистон, Афғонистон, Туркия, Ироқ, Фаластин, Сенегал ва дигар кишварҳои исломӣ бо барпо кардани тазоҳуроти густарда маҳкум карданд. Попи Франсис, раҳбари католикҳои ҷаҳон низ ин иқдомро маҳкум кард.
Рӯзи чоршанбе, 12-уми июли соли ҷорӣ Шӯрои ҳуқуқи Созмони Миллаи Муттаҳид дар пайи сӯзондани Қуръони Карим қатънома дар бораи нафратпарокании диниро қабул кард.
Инчунин Шайхул Азҳар бо нашри баёнияе омилони қуръонсӯзиро “ҷинояткор” ва “террорист” номида, таъкид кард, ки кишварҳои арабӣ ва исломиро лозим аст, мавқеъгириҳои ҷиддитаре алайҳи сиёсатҳои душманонаи кишвари Суед алайҳи Ислом ва мусалмонон дошта бошанд.
Пас аз ин ҳама вокунишҳо рӯзи 24-уми июл дар Копенҳагени Дания ду узви гурӯҳи миллатгарои “Патриотҳои Дания” назди бинои сафорати Ироқ Қуръонро оташ заданд. Панҷшанбеи гузашта низ гурӯҳе аз фаъолон ин корро дар назди сафорати Ироқ анҷом дода, парчами Ироқро зери по карданд.
Аввалин шуда миёни Президентҳои Осиёи Марказӣ Қосим-Ҷомарт Тоқаев сӯзондани “Қуръон” дар Суде ва Данияро маҳкум кард.
