Мақомоти Қирғизистон мегӯянд, раванди аломатгузорӣ байни нуқтаҳои муайяншудаи марзи Тоҷикистон ва Қирғизистон қариб ба поён расидааст.
Раиси Кумитаи давлатии амнияти миллии Қирғизистон Қамчибек Ташиев 12-уми декабри соли ҷорӣ зимни боздид аз раванди алаоматгузорӣ дар вилояти Боткен, ки бо вилояти Суғди Тоҷикистон ҳаммарз аст, гуфт, ки ҳоло дар ин минтақа беш аз 80% қитъаи марзии муайяншуда бо монеаҳои амниятӣ, аз ҷумла симхор ва дигар воситаҳои муҳофизатӣ таъмин шудааст. Ӯ мегӯяд, қарор аст, раванди аломатгузорӣ дар 20 дарсад аз нуқтаҳои боқимондаи давлатӣ соли 2026 ба поён расад.
Хадамоти матбуоти КДАМ-и Қирғизистон мегӯяд, Ташиев дар ин дидор ба роҳбарони сохторҳои дахлдор супоришҳо дода, ки зерсохторҳои марзиро таҳким бахшанд, низоми марзиро пурзӯр намуда, сатҳи амниятро боло баранд ва суръати корҳои сохтмониро тезонанд.
Аммо ҳоло маълум нест ҷониби Тоҷикистон дар ин раванд ба куҷо расидааст ва тавофуқоти онҳо дар аломатгузорӣ чӣ будааст. Мақомоти тоҷик дар бораи марз ба расонаҳо гузориш намедиҳанд.
Корҳои аломатгузорӣ ва насби симхорҳо дар марзи Тоҷикистону Қирғизистон дар ҳолест, ки чанд соли ахир ба сабаби мушкилоти марзӣ байни ин ду кишвари ҳамсоя чанд маротиба задухӯрдҳои мусаллаҳона сурт гирифт, ки чандин нафар аз ду ҷониб кушта ва захмӣ шуданд. Билохира, моҳои марти соли 2025 ҷонибҳо ин мушкилот нуқта гузошта, марзҳои давлатиро муайян карданд ва ҳоло раванди аломатгузорӣ идома дорад.
Оғози марҳилаи аломатгузорӣ дар марзҳо низ пас аз он оғоз гардид, ки ҷонибҳои музокиракунанда ба тавофуқи ниҳоӣ расиданд ва сипас парлумонҳо онро тасдиқ намуда ва дар охир расиҷумҳурони ду кишвар ба санади тавофуқномаи марзӣ имзо гузоштанд. Пас аз ин, муносибатҳои дипломатӣ, тиҷоратӣ ва фарҳангӣ низ аз нар гирифта шуд.
Аммо мақомоти Тоҷикистон то ҳанӯз равнди музокирот ва ҷойҳое, ки гузашт карданд ва ба Қирғизистон бахшиданд ва аз онҳо кадом минтақаҳоро ба даст оварданд, умуман маълумот намедиҳанд.
