Мақомоти Туркия шаҳрвандии раҳбари Ҷамоати “Ихон-ал-муслимин” дар Миср Маҳмуд Ҳусейнро ҳамроҳи ҳамсараш бекор карданд.
Бино ба иттилои расонаҳои мисрӣ, Маҳмуд Ҳусейн раҳбари ихвониҳо аз соли 2014 дар Истанбул зиндагӣ мекунад ва ӯ пештар шаҳрвандии Туркияро ҳамроҳи ҳамсараш ба даст оварда буданд. Сабаби лағви шаҳрвандии онҳо мухолифат ба шартҳои шаҳрвандии ин кишвар мебошад.
Гуфта мешавад, мақомоти Туркия раҳбари ин ҷамоатро ҳамроҳи беш аз 40 нафар дигар аз пайравонаш дар мухолифат ба шартҳои гирифтани шаҳрвандӣ аз роҳи дороии моликият, аз ҷумла харидани хона дар Туркия муттаҳам кардаанд.
Ба навиштаи расонаҳо, ин гурӯҳ дар шаҳри Истанбул ва дигар шаҳрҳои Туркия хона харида ва ба ин восита шаҳрвандии Туркияро соҳиб гаштанд, вале дар давоми камтар аз се сол хонаҳоро боз ба дигарон фурӯхтаанд. Тибқи қонунҳои ин кишвар, шаҳрванди хориҷие, ки бо роҳи харидани манзил ва дигар моликиятҳо соҳиби шаҳрвандии Туркия мешавад, то 3 сол ҳаққи фурӯхтани хонаҳоро надорад.
Аммо бархе расонаҳо аз манобеи наздик ба ҷамоати “Ихвон-ал-муслимин” дар Туркия менависанд, ки ба эҳтимоли зиёд қарори ҳукумати ин кишвар барои бекор кардани шаҳрвандии Маҳмуд Ҳусейн ва ҳамроҳонаш дар пайи сафари Раҷаб Тайиб Эрдуғон, раисҷумҳури Туркия ба Миср ва мулоқоти ӯ бо ҳамтои мисрияш Абдулфаттоҳ Сисӣ сурат гирифтааст.
Дар ҳамин ҳол рӯзноманигори мустақил Сомӣ Камолуддин дар ҳисоби “Х”-аш ин иддаоҳоро рад карда, мегӯяд, ки ин ҳама овозаи дурӯғ асту асосе надоранд. Ба гуфтаи ӯ, овозаи бекор кардани шаҳрвандии раҳбари ихвониҳо се моҳ пеш аз сафари Эрдуғон ба Миср аз ҷониби расонаҳои Миср ва Саудӣ паҳн шуда буданд.
Аксари рӯзноманигорону таҳлилгарони мустақил низ дар навиштаҳои худ таъкид мекунанд, ки як овозаи беасос аст.
То ҳанӯз дар ин бора мақомоти Туркия маълумоти расмӣ нашр накардааст ва назари худи раҳбарони ихвон ҳам дар ҷое вобаста ба ин хабар расонаӣ нашудааст.
