Даҳҳо созмони байналмилалии ҳуқуқи башар ва демократӣ бо нашри баёнияи муштараке даъват кардаанд, ки ҳамаи шахсоне, ки барои истифода аз ҳуқуқу озодиҳои асосии худ ноодилона аз озодӣ маҳрум шудаанд, фавран озод карда шаванд.
Дар ин баёния, ки бахшида ба Рӯзи байналмилалии зиндониёни сиёсӣ, 30-уми октябри соли ҷорӣ нашр шуд, таъкид мешавад, ки “ҳеҷ кас набояд барои ба таври осоишта баён кардани ақидаҳои худ ба зиндон андохта шавад”.
Ба ҳисоби ин созмонҳо, имрӯз дар ҷаҳон тақрибан як миллион зиндонии сиёсӣ, ки миёнашон рӯзноманигорон, ҳомиёни ҳуқуқ, сиёсатмадорони мухолиф, роҳбарони мазҳабӣ, ҳунармандон ва шаҳрвандони оддӣ ҳастанд, вуҷуд доранд.
Инчунин ин созмонҳо гуфтаанд, ки режимҳои худкома зиндонӣ кардани афродро ҳамчун абзори фишор ва тарс истифода мебаранд, то озодандешонро хомӯш кунанд ва қудрати худро устувор намоянд.
Онҳо аз давлатҳои демократӣ даъват карданд, ки озод кардани зиндониёни сиёсиро дар авлавияти кори худ қарор диҳанд ва ин масъаларо дар сатҳи дуҷониба ва бисёрҷониба пайваста бардошта, чораҳои мушаххасро ба манфиати маҳбусон талаб намоянд. Инчунин ба созмонҳое, ки аз боздоштшудагон ҳимоят мекунанд ва ба онҳо ва хонаводаҳояшон кумакҳои ҳуқуқӣ ва башардӯстона мерасонанд, ёрӣ расонанд.
Дар байни имзокунандагони ин изҳорот National Endowment for Democracy (NED), Freedom House, Amnesty International, Human Rights Watch, Human Rights Foundation, OVD-Info, Маркази озодиҳои шаҳрвандӣ, Бунёди Мемориал, Бунёди Ҷон Маккейн, Лоиҳаи байналмилалии ҳуқуқи башар, Victims of Communism Memorial Foundation, World Liberty Congress ва дигарон буда, дар баёнияашон бо хонаводаҳо, вакилони мудофеъ ва созмонҳои ҷомеаи шаҳрвандӣ, ки дар шароити фишору саркӯбӣ ҳамоно барои озодӣ мубориза мебаранд, изҳори ҳамбастагӣ кардаанд.
Дар охири баёнияи ин созмонҳо таъкид карданд, ки “Зиндониёни сиёсии ҷаҳон набояд фаромӯш шаванд ва озодии онҳо бояд ҳадафи ҷаҳонӣ боқӣ монад”.
Гуфта мешавад, Рӯзи байналмилалии зиндониёни сиёсӣ аз 30-юми октябри соли 1974, ки он рӯз маҳбусони сиёсӣ дар Иттиҳоди Шӯравӣ яқҷо гуруснанишинӣ баргузор карда буданд, сарчашма мегирад. Маҳбусони шӯравӣ ҳар сол 30-юми октябр ин эътирозро такрор мекарданд ва онро намоишҳои ҳамбастагӣ дар шаҳрҳои бузург дастгирӣ менамуданд. Дар посух ба саркӯби идомаёбанда ва шадидтари Владимир Путин, маҳбусони сиёсии Русия соли 2021 ин анъанаро дубора эҳё карданд ва баъд ин рӯз ба рӯзи байналмилалии ҳамбастагӣ бо зиндониёни сиёсӣ дар саросари ҷаҳон табдил ёфт.
