Бонки миллии Тоҷикистон, тайи даҳ рӯзи ахир дасти кам се маротиба қурби рубли русиро дар баробари пули миллӣ-сомони поён овард.
Бино ба иттилои Бонки миллии Тоҷикистон, 14-уми майи соли 2023 қурби 1 рубли русӣ дар баробари пули миллӣ-сомонӣ баробар ба 0,1300 қимат дорад ва дар муқобили ҳар 1000 рубли русӣ 130 сомонӣ нархгузорӣ шудааст. Бо ин вуҷуд ҳангоми хариду фурӯш дар бонкҳои тиҷоратии кишвар ин рақамҳо фарқ мекунанд.
Бархе коршиносон мегӯянд, Бонки миллии Тоҷикистон, ҳамчун бузургтарин муассисаи молии давлат, ки ҳамзамон ягона ниҳоди расмӣ дар раванди таъйини қурби асъори хориҷӣ дар кишвар дониста мешавад, боло бурдани қурби пули миллӣ-сомониро дар баробари рубли русӣ бар асоси додаҳои биржаҳои молии ҷаҳонӣ таъйин кардааст, на ин ки дар воқеъ арзиши пули миллӣ-сомонӣ дар баробари дигар асъори хориҷӣ боло рафта бошад.
Ин коршиносон иддаъои худро бар асоси тағйир наёфтани арзиши пули миллӣ-сомонӣ дар баробари асъори хориҷӣ ба милси доллари амрикоӣ ва евро арзёбӣ карда, мегӯянд, агар дар асл арзиши пули миллӣ-сомонӣ боло мерафат, Бонки миллии Тоҷикистон қурби доллари ИМА ва евроро ҳам тағйир медод.
Гуфта мешавад, бар асоси нархгузии Бонки миллӣ ба ҳолати имрӯз, 1 доллари амрикоӣ баробар ба 10,9140 сомонӣ, 1 евро муодили 11,7817 сомонӣ ва 1 юани Чин баробар ба 1,5263 сомонӣ баҳогузорӣ шудаанд. Қурби рубли русӣ дар биржаҳои молии ҷаҳонӣ низ баробар ба қурби таъйин кардаи Бонки миллӣ коҳиш ёфтааст.
