Ҳамалоти ҳавоии Покистон ба хоки Афғонистон бо вокунишҳои тунди Иморати исломии Толибон дар Афғонистон мувоҷиҳ шуд.
Бино ба иттилои расонаҳо, бомдоди рӯзи 18-уми марти соли ҷорӣ нерӯҳои ҳавоии Покистон ба хоки Афғонистон ҳамла карда, дар натиҷа 8 нафар, аз ҷумла 3 зан ва 3 кӯдак кушта шуданд.
Вазорати дифои миллии Афғонистон бо нашри як иттилоия ин ҳамалоти нерӯҳои ҳавоии Покистонро таъйид карда, гуфтааст: “бомдоди имрӯз, ҳавопаймоҳои ҷангӣ ва истихборотии покистонӣ дар як иқдоми таҷовузкорона бори дигар ба хоки Афғонистон ворид шуданд ва хонаҳои маскунии афроди мулкиро дар ноҳияҳои Спираи вилояти Хуст ва Бармили вилояти Пактико бамборон карданд.”
Пеш аз ин Покистон иддао кард, ки дар ҳамалоте, ки субҳи имрӯз ба манотиқе дар вилоятҳои Хуст ва Пактикои Афғонистон анҷом дод, раҳбари Таҳрики Толибони Покистон (ТТП) кушта шудааст, вале ТТП бо нашри як баёния ин ҳамалотро маҳкум карда гуфтааст, ки раҳбари он Абдуллоҳ Шоҳ Маҳсуд дар Афғонистон не, балки дар дохили Покистон аст.
Вазорати дифои миллии Афғонистон ҳам таъкид кардааст, ки посух ба ин ҳамалот нерӯҳои марзбонии Афғонистон бунгҳои низомии артиши Покистон дар имтидоди марзҳои ду кишвар қарор доранд, тавассути тупхонаҳо мавриди ҳамла қарор гирифтаанд.
Аммо ба фарқ аз гузашта, ин дафъа Толибон ба сурати хеле ҷиддитар вориди амал шуда, ба Покистон ҳушдор додаанд, ки бояд “мушкилот ва нотавонии хешро ба дӯши Афғонистон наандозад”, мушкилоти дохилии худро байни худ ҳаллу фасл кунанд ва дар ғайри он “нерӯҳои амниятӣ ва дифоии ин кишвар омодаанд, ки аз марзу буми ин кишвар ҳимоят кунанд.”
Гуфта мешавад, аз замони дубора сари қудрат омадани Толибон дар Афғонистон ин бори аввал нест, ки манотиқи марзҳои ду кишкир омоҷи ҳамалоти тупхонаӣ қарор мегиранд, балки дар гузашта, ин гуна ҳамлаҳои тупхонаӣ байни марзҳои Афғонистон ва Покистон ва Афғонистону Эрон ҳам сурат гирфита буд.
Ин ҳамалоти Покистон дар ҳоле анҷом шуда, ки 16-уми марти соли ҷорӣ нерӯҳои артиши ин кишвар дар минтақаи Вазиристони Покистон мавриди ҳамла қарор гирифта буданд ва дар натиҷа 6 нафар аз нерӯҳои покистонӣ кушта шуданд. Покистон дар он ҳамла нерӯҳои ТТП-ро муттаҳам карда буд. ТТП ҳам баъдтар масъулияти он ҳамларо ба дӯш гирифт.
Осиф Дурронӣ, намояндаи вежаи Покистон дар умури Афғонистон ҳам иддао кардааст, ки бар асоси шавоҳиде, ки дар даст доранд, аз 5 то 6 ҳазор нафар нерӯҳои Таҳрики Толибони Покистон дар Афғонистон вуҷуд дорад, иддаоҳое, ки ҷониби Толибони Афғонистон онҳоро рад мекунад.
