Мақомоти Тоҷикистон мегӯянд, ки агар боридани барфу борон зиёд шавад, лимити барқ камтар мешавад.
Далер Ҷумъа, вазири энергетика ва захираҳои оби Тоҷикистон 29-уми январи соли ҷорӣ зимни нишасти хабарие дар Душанбе гуфт, беҳтар шудани таъмини мардум бо нерӯи барқ ба саховати табиат вобаста аст, аммо нагуфт, ки лимит кай пурра бардошта мешавад.
Ҳамчунин ӯ ба суоли хабарнигорон, ки чаро оғозу анҷом ва реҷаи маҳдудияти интиқоли барқ ба сокинон расман эълон намешавад, посухи равшан надода, танҳо гуфт, ки “Ин як низоми бисёр бузург аст, ҳаррӯз 4 маротиба амалиёт гузарондан, дар масъалаи барқро додану хомӯш кардан, ин аз лиҳози низом як кори бисёр ҳам мураккаб аст ва ҳам вақтгир аст. Албатта, дар баъзе мавридҳо ин ё он минтақа барқро ё барвақттар ё дертар медиҳанд”.
Дар идома Далер Ҷумъа иддао кард, ки реҷаи барқ аз соати 5 то 8 субҳ ва аз 17 то 21-и шом муқаррар шудааст ва мисли солҳои пеш реҷа вобаста дар моҳи Рамазон риоят мешавад ва ҳатто дар ин моҳ зиёдтар барқ дода мешавад.
Аммо сокинони кишвар мегӯянд, ки дар аксар шаҳру ноҳияҳои ҷумҳурӣ, бахусус деҳоти дурдаст барқ тақрибан 2-4 соат дар як шабонарӯз дода мешавад.
Ва маҳдудияти шадиди инқоли нерӯи барқ дар ҳолест, ки мақомоти Тоҷикистон аз афзоиши 7-% истеҳсоли нерӯи барқ дар соли 2025 хабар медиҳанд, ки тибқи омори расмӣ, ҳаҷми умумии он ба 24 млрд кВт·соат расидааст.
