Вячеслав Володин, раиси Думаи давлатии Русия пешниҳод кардааст, ки назорат бар муҳоҷират пурзӯр карда шуда, муҳоҷирон ба кор дар соҳаҳои тарбия, таълим ва тандурустӣ роҳ дода нашаванд.
Володин дар саҳифаи “Телеграм”-аш навиштааст, ки ин соҳаҳо бояд таҳти назорати шаҳрвандони Русия бошад. Аммо маълум нест, ба ин гурӯҳ шаҳрвандон, зодагони Осиёи Марказӣ, ки шиносномаи ин кишварро дарёфт кардаанд, дохил мешаванд ё на.
Тибқи омори раиси Дума, аз соли 2014 то кунун барои танзими ва пурзӯр кардани назорат болои муҳоҷират 13 қонун қабул шудааст ва ҳоло чандин лоиҳаи қонун дар парлумон дар ҳоли баррасӣ аст.
Ҳоло вакилони рус бар зарурати супоридани имтиҳони ҳатмии шифоҳӣ аз забони русӣ барои муҳоҷироне, ки тибқи “патент” кор мекунанд, исрор меварзанд. Онҳо вусъат бахшидани сабти видеоии имтиҳонҳоро пешниҳод намуда, мехоҳанд мизони мушаххаси донистани забон вобаста ба касб муқаррар карда шавад. Илова бар ин, дар назар аст, ки рӯйхати муассисаҳои ваколатдоре, ки ҳаққи гузаронидани имтиҳонҳоро доранд муайян ва маводи имтиҳонҳо мунтазам нав карда шаванд.
Инчунин вакилони рус лоиҳаеро баррасӣ доранд, ки тибқи он шумора ва тахассуси коргарони хориҷӣ муайян, ҷамъоварии ҳатмии маълумоти биометрии муҳоҷирон ҷорӣ ва қоидаҳои назорати будубоши муҳоҷирон сахттар карда мешавад.
Қарор аст ҳафтаи оянда вакилони рус тарҳи қонунеро баррасӣ кунанд, ки тибқи он қабули фарзандони муҳоҷироне, ки забони русиро намедонанд, ба мактабҳо мамнуъ мешавад.
Чанд моҳи охир мақомоти Русия фишор болои муҳоҷирони кориро бештар карда, барои маҳдуд кардани фаъолияти онҳо қонунҳои зиёдеро қабул карда истодаанд. Ҳатто кори муҳоҷирон бо баҳонаи амниятӣ дар баъзе соҳаҳо, аз ҷумла таксиронӣ дар аксар минтақаҳои ин кишвар манъ шуда, нархи иҷозатномаи корӣ ҳам гарон шудааст.
