Рамазон Раҳимзода, вазири корҳои дохилаи Тоҷикистон гуфт 18 нафаре, ки Тоҷикистон аз Утриш дархости истирдодашонро кардааст, ҷузъи 4126 нафареанд, ки аз тарафи Тоҷикистон дар пайгарди пулиси байналмиллалӣ – Интерпол қарор доранд.
Вазири корҳои дохилаи Тоҷикистон дар нишасти матбуотиаш, ки имрӯз 21 июл дар Душанбе баргузор гардид, дар посух ба суоли хабарнигорон дар бораи 18 нафар шаҳрвандони Тоҷикистон, ки мақомот истирдодашонро талаб кардаанд, гуфт “ҳангоми вохӯрӣ, ҳангоми сӯҳбат бо сохторҳои ҳамкорӣ мо дар Аврупо, ҳама вақт мо дархостҳоро месупорем, ки ин нафарон дастгир шаванд. “Охират (шояд оқибат гуфтан мехост) дастгир мешавад, охират ба ҷумҳурии Тоҷикистон оварда мешавад ва назди қонун ҷавоб мегӯяд” – гуфт Раҳимзода.
Гуфтанист, тибқи иттилоъи тоҷикони муқими Утриш, мақомоти Тоҷикистон аз ин кишвар истирдоди 18 паноҳандаи муқими ин кишварро талаб кардаанд. Дар ин рӯйхат Шавкати Муҳаммад (Шавкатҷон Шарипов), сухангӯи Паймони Миллии Тоҷикистон низ қарор дорад, ки қарор аст Додгоҳи ҷиноии Утриш рӯзи 5 август дархости Тоҷикистон нисбати ӯро баррасӣ кунад.
Тибқи иттилоъи манобеъи АЗДА ТВ, додгоҳҳои Утриш аллакай парвандаи 5 нафарро баррасӣ карда ва ба Тоҷикистон ҷавоби рад додаанд. Яке аз онҳо то ҳол мақоми паноҳандагӣ дарёфт накарда буд, аммо баъди дархости Тоҷикистон Додгоҳ мақмоти муҳоҷирати Утришро вазифадор кардааст ба ӯ паноҳандагӣ бидиҳанд.
Рамазон Раҳимзода ба суоли дигари рӯзноманигорон дар бораи ғайб задани як паноҳандаи истирдодшуда аз Лаҳистон изҳори бехабарӣ кард ва гуфт Вазорати корҳои дохила чунин маълумоте дар даст надорад.
Дар ин нишаст вазири дохила ҳамчунин гуфт “аз 7823 нафар шахсони дар ҷустуҷӯ қарордошта 1579 нафар дастгир карда шуда, 580 нафар ихтиёран ба ватан баргардонида шуд”.
Раҳимзода иддаъо кард сатҳи ҷинояткори дар Тоҷикистон “нисбат ба ҳамаи кишварҳои узви ИДМ дар пасттарин сатҳ қарор дорад” ва омори ниҳоди зертобеъи худашро бо оморҳои Қирғизистону Молдова муқоиса кард.
