Субҳи рӯзи 24-уми сентябр зиндонии сиёсӣ Зубайдуллоҳи Розиқ, собиқ узви Раёсати олии Ҳизби наҳзати исломии Тоҷикистон дар зиндон даргузашт.
Зубайдуллоҳи Розиқ, рӯзноанигор, донишманд ва рӯҳонии 80-солаи тоҷик дар ин авохир аз бемории ранҷ мекашид. Вай то рӯзи вафот дар зиндони Ваҳдат ба сар мебурд.
Марҳум сентябри соли 2015 дар қазияи пурсарусадои боздошти аъзои аршади ҲНИТ, ки дар ҳамдастӣ бо “ошӯби Ҳоҷӣ Ҳалим” муттаҳам мешуданд, аз ҷониби КДАМ боздошт шуд ва аз ҷониби мақомоти додгоҳии Тоҷикистон ба 25 соли зиндон маҳкум гардид. ҲНИТ пайваста ин иттиҳморо рад кардааст.
Ин чорумин узви Раёсати олии ҲНИТ аст, ки пас аз соли 2015 дар зиндонҳои Тоҷикистон мефавтад. Танҳо дар давоми як соли ахир 6 зиндонии сиёсӣ аз Бадахшон дар зиндонҳо ба сабаби бе таваҷҷуҳии масъулон нисбат ба саломатии зиндониён даргузаштааст.
Ӯ соли 2021 бо навиштани номаи саргушода ба Эмомалӣ Раҳмон, аз бегуноҳии худ гуфта буду бозбинии парвандаашоро талаб карда буд. Вале дар ҷавоб мақомоти зиндон ба ҷои бозбинии парванда, худи ӯро ба хотири навиштани нома ба утоқи ҷаримавӣ (ШИЗО) бурданд, ки вазъи саломатияш хеле вазнин шуда буд.
Созмони Милали Муттаҳид, Иттиҳоди Аврупо ва чандин созмонҳои бо нуфузи байналмилалӣ Зубайдуллоҳи Розиқро ҳамроҳ бо дигар аъзои аршади ҲНИТ бегуноҳ эътироф карда, борҳо озодии онҳоро аз ҳукумати Эмомалӣ Раҳмон талаб карда буд.
Домулло Зубайдуллоҳи Розиқ 8-уми августи соли 1945 дар ноҳияи Абдураҳмони Ҷомӣ (собиқ ноҳияи Куйбишев) таваллуд шуда, Донишгоҳи омӯзгории шаҳри Кӯлобро хатм кардааст. Ӯ солҳои зиёд ҳамчун сардабири нашрияи расмии ҲНИТ – рӯзномаи «Наҷот» фаъолият мекард. Ва то замони боздошт масъулияти Академияи ҲНИТ-ро ба уҳда дошт.
