Эмомалӣ Раҳмон, раисҷумҳури кишвар як зиндонии шаҳрванди Эронро, ки дар Тоҷикистон зиндонӣ буд, авф кард, ки ӯ имрӯз ба ватанаш баргашт.
Дар ин бора Муҳаммадтақии Собирӣ, сафири Ҷумҳурии исломии Эрон дар Тоҷикистон дар ҳисоби твиттераш хабар дод.
Бино ба навиштаи ҷаноби Собирӣ, ин авф дар пайи дархости ӯ аз Раҳмон ва ба муносибати иди саиди Фитр сурат гирифтааст.
Гуфта мешавад, ин шаҳрванди Эрон имрӯз ба Ватанаш баргардонида шудааст.
Номи ин маҳбуси эронӣ дастрасӣ расонаҳо нест, аммо сафири Ҷумҳурии исломии Эрон таъкид кардааст, ки ин нафар ягона маҳбуси эронӣ буд, ки дар зиндонҳои Тоҷикистон нигоҳдорӣ мешуд.
Ин дар ҳолест, ки тайи чанд соли охир мақомоти интизомии кишвар аз боздошту зиндонӣ кардани чанд шаҳрванди Эрон хабар дода буданд.
Эмомалӣ Раҳмон дар ҳоле ба муносибати Иди саиди Фитр як маҳбус, он ҳам шаҳрвандии Эронро авф кардааст, ки кишварҳои ҳамсоя ба фарқ аз ӯ садҳо зиндониро ба муносибати ин ид аз зиндонҳо озод карданд.
