Муҳиддин Кабирӣ, раиси Паймони миллии Тоҷикистон дар раъси як ҳайат аз 26-ум то 30-уми сентябри соли 2023 ба кишвари Литва сафар кардааст.
Бино ба иттилои Дафтари матбуоти ПМТ, ҳайати он зимни сафар ба ин кишвари аврупоӣ бо мақомот, вакилони парлумон аз ҳизбҳои сиёсии мухталиф, чеҳраҳои сиёсӣ ва намояндагони ҷомеаи шаҳрвандӣ дидор ва гуфтугӯ кард.
Дар ин сафар Муҳиддин Кабирӣ, раиси ПМТ-ро Шоҳнаим Карим, муовини раиси ҲНИТ, Маҳмудҷон Файзраҳмонов, раиси Департаменти равобити хориҷии ПМТ, Бобоҷон Қаюмов, муовини раиси Департаменти расонаҳои ПМТ ва Илҳомҷон Ёқубов, намояндаи ПМТ дар Литва ҳамроҳӣ карданд.
Сухангӯи ПМТ Салим Султонзода дар саҳифаи фейсбукияш навишта, ки зимни мулоқот раҳбарияти ПМТ бо мақомоти гуногуни Литва вазъяти кунунии Тоҷикистон, минтақаи Осиёи Марказӣ ва дигар масоили муҳимро баррасӣ карданд.
Ҳамчунон гуфта мешавад, раҳбари ПМТ бо чанде аз расонаҳои маҳаллии ин кишвар, аз ҷумла телевизоини Delfi ва радиои LRT, мусоҳиба анҷом дода, ки муҳтавои он ба зудӣ нашр хоҳад шуд.
