Вазорати корҳои хориҷии Тоҷикистон бо нашри як изҳорот ҳамла ба беморхонаи ал-Аҳлии Маъмадонӣ дар Навори Ғаззаро шадидан маҳкум кард.
Бино ба иттилои расмӣ, субҳи 18-уми октябри соли 2023 Вазорати корҳои хориҷии Тоҷикистон бо нашри як изҳорот гуфт, “ҳамла ба беморхонаи Ал-Аҳлии Фаластинро, ки боиси куштаву захмӣ шудани теъдоди зиёди одамон, аз ҷумла кӯдакону занон гардид, шадидан маҳкум менамояд.”
Вазорати корҳои хориҷии кишварамон таъкид кард: “Иншооти ғайринизомӣ, махсусан беморхонаҳо ба ҳеҷ ваҷҳ набояд мавриди ҳамла қарор гиранд ва дар ҳама гуна шароит бояд макони амн барои хизматрасонӣ ба мардум бошанд.”
Вазорати корҳои хориҷӣ дар идомаи изҳораташ ҳама гуна “амалҳои зуровариро қатъиян маҳкум карда, ҷонибҳоро барои оташбаси фаврӣ ва оғози муколама баҳри ба эътидол овардани вазъ даъват” кардааст.
Ҳамзамон Раёсати Олии Ҳизби Наҳзати Исломии Тоҷикистон (ҲНИТ) низ бо нашри як изҳорот гуфта, “ҳамлаи Исроил ба бемористони Алмаъмадони дар Ғаззаро, ки беш аз 1000 куштаву захмӣ ба ҷо гузошт, маҳкум мекунад.” ҲНИТ мегӯяд, “ин ҳамла бо тамоми қонунҳои байналмилалӣ ва ҳамаи арзишҳои инсонӣ мухолиф аст.”
Раёсати Олии ҲНИТ ҳамчунин таъкид карда, ки “ин ҳамла ҳеҷ тавҷеҳе надорад ва ин ҷанг бояд ҳарчи зудтар мутаваққиф шавад.”
Гуфта мешавад, шоми рӯзи 17-уми октябри соли ҷорӣ бемористони ал-Аҳлии Маъмадонӣ дар Ғазза, ки як бемористони мансуб ба ҷараёни баптисҳои масеҳӣ аст, мавриди ҳамлаи мӯшакӣ қарор гирифт. Дар натиҷа ин ҳамла тибқи охирин оморҳои нашршуда, наздик ба 1 ҳазору 400 нафар кушта ва захмӣ ба ҷо гузошт, ки аксари онҳоро кӯдакону занон ва пизишконе, ки дар ин бемористон кор мекарданд, ташкил медиҳад.
Ҳамла ба ин бемористон вокунишҳои тундеро дар кишварҳои исломӣ ва ғайриисломӣ ба бор овардааст. Нерӯҳои Фаластинӣ ва кишварҳои ҳамсояи Фаластин масъулияти ин ҳамларо ба дӯши Исроил бор карданд. Аммо мақомоти исроилӣ тайи камтар аз 20 соати ахир дасти кам чор маротиба дар бораи ин ҳодиса тағйири мавзеъ карда, ахиран нерӯҳои фаластиниро ба сар задани ин ҳодиса муттаҳам карданд.
