Қарор буд имрӯз, 18-уми октябр раисҷумҳури Амрико Ҷо Байден пас аз сафар ба Исроил барои мулоқот бо сарони бархе кишварҳои арабӣ вориди Урдун мешуд, аммо ин сафар ва мулоқот лағв шуд.
Сабаби лағви ин сафар ва мулоқоти муҳим бо шоҳи Урдун Абдуллоҳ, расиҷумҳури Миср Абдулфаттоҳ Сисӣ, раиси ташкилоти худгардони Фаластин Маҳмуд Аббос дар Уммон ҳуҷуми шаби гузаштаи Исроил ба беморхонаи ал-Аҳлии Маъмадонии Ғазза гуфта мешавад, ки он бештар аз 500 кушта ва садҳо маҷруҳ ба ҷо гузошт.
Аммо Байден ба Исроил сафар кард. Ӯ зимни вохӯрӣ бо сарвазири Исроил Бинёмин Натанёҳу фарзияи ин кишварро дар мавриди он ки мушак кори дасти артиши Исроил набуда, балки он муашки хаторафтаи худи гурӯҳи ҷиҳодии ҲАМОС буд, тасдиқ кард. Ӯ дар ин бора гуфт: “Дар мавриди бомборони бемористон дар Ғазза хашмгин шудам, маълум аст, ки ин кори онҳо (ҲАМОС) аст, на кори шумо.“
Раисҷумҳури Амрико дар ин мулоқот дар ҳузури расонаҳо бори дигар ҷонбидории қатъии худро аз Исроил ва мардуми он эълон намуда, таъкид кард, ки сафари ӯ ба Исроил “ба хотири он аст, ки мардум ва ҷаҳон бидонад, Амрико дар паҳлуи Исроил аст.”
Ёдовар мешавем, ки пас аз ҳамлаи ҲАМОС ба Исроил аз 7-уми октябр ҳамлаи шадиди Исроил болои Ғазза шуруъ шудааст. То ин дам мувофиқи оморҳои расмии Вазорати беҳдошти Фаластин, 3500 нафар дар Ғазза кушта шудаанд, ки 500 нафари онҳо занҳо ва 700 нафари дигарро кӯдакон ташкил медиҳанд. Ҳамчунин омори захмиён ба 13 ҳазору 500 нафар расидааст. Танҳо дар ҳамлаи шаби гузашта ба беморхонаи ал-Аҳлӣ, ки аксари кишварҳо онро кори Исроил медонанд, 500 нафар кушта шуд.
Аз ҷониби дигар, Исроил низ то кунун аз кушта шудани 1400 шаҳрванди худ ва асир афтодани 199 нафари дигар тавассути нерӯҳои ҲАМОС хабар додааст.
