Бино ба иттилои расонаҳо, субҳи имрӯз, 8-уми декабри соли 2023 сафорати Иёлоти Муттаҳидаи Амрико дар Бағдод, пойтахти Ироқ мавриди ҳамлаи мусаллаҳона қарор гирифт.
Бархе расонаҳо навори видиоеро нашр кардаанд, ки дар он дида мешавад субҳи барвақт чанд ҳамлаи рокетӣ сурат мегирад ва гуфта мешавад, ки ин сабти лаҳзаи ҳамла ба сафорати Амрико дар Бағдод мебошад.
Дар бораи осеб дидани кормадони ин сафорат гузориш нашудааст. Аммо сухангӯи сафорати Амрико дар Ироқ аз мақомоти ин кишвар хостааст, ки амнияти кормандони дипломатии сафорат ва дигар ниҳодҳои нерӯҳои Эътилофи байналмилалиро таъмин кунад. Бо ин вуҷуд, то ҳол ҳеч як гурӯҳи мусаллаҳе ин ҳамларо бар уҳда нагирифтааст.
Дар ҷанги Исроил бо фаластиниҳо дар Навори Ғазза Амрико дар паҳлӯи Исроил қарор гирифта, ба қавли расонаҳо, дар муддати ду моҳи ҷанг ҳазорҳо тонна силоҳ ва дигар муҳиммоти ҷангӣ ба нерӯҳои исроилӣ фиристодааст. Инчунин ҳудуди 2000 нафар аз нерӯҳои вежаи амрикоӣ мавсум ба “Делта” низ ҳамчун мушовирони ҷангӣ дар канори нерӯҳои исроилӣ ҳузур доранд.
Гуфта мешавад, аз замони оғози ҳамлаҳои Исроил ба Навори Ғазза ва шиддат гирифтани ҳамлаҳои шаҳракнинони исроилӣ ба Каронаи Бохтарӣ дар Фаластин бархе нерӯҳои силоҳбадасти ироқӣ ҳудуди 100 маротиба пойгоҳҳои низомии Амрико дар Ироқ ва Сурияро мавриди ҳамлаҳои гунон қарор дода буданд. Аммо дар ин муддат ин бори аввал аст, ки сафорати Амрико дар Бағдод ҳам дар феҳристи ҳадафҳои ин нерӯҳо қарор мегирад.
