Бо ворид шудани ҷанг дар Ғазза ба рӯзи 88-ум Исроил ҳамлаҳои ҳавоии худро дар ин минтақа шиддат бахшидааст. Мақомоти фаластинӣ аз вазъи асафбори инсонӣ дар Ғазза ҳушдор медиҳанд.
Мақомоти фаластинӣ дар Ғазза мегӯянд, аз оғози ҳамлаҳои ҳавоӣ ва заминии Исроил бар Навори Ғазза то имрӯз 22 ҳазору 185 фаластинӣ ҷони худро аз даст дода ва беш аз 57 ҳазор нафари дигар захмҳои гуногун бардоштаанд. Мақомот мегӯянд, 70 дарсади кушташудаҳоро кӯдакону занон ва пиронсолон ташкил медиҳанд.
Вазорати беҳдошти Фаластин ва ҳамзамон созмонҳои кумакрасонии байналмилалӣ бо нигаронӣ хабар доданд, ки ба сабаби бомборонҳои зиёди артиши Исроил қисми зиёди бемористонҳои Ғазза пурра аз фаъолият бозмондаанд ва ҳатто беморони гурда ва саратон беназорати табибон мондаанд.
Дар баробари ин артиши Исроил низ аз кушта шудани чанде аз афсарони баландмақомаш хабар дод ва дар маҷмуъ то имрӯз 507 сарбозу афсари исроилӣ дар Ғазза кушта шудаанд. Ҳамчунин Исроил аз захмӣ шудани 2234 сарбоз иттилоъ дода ва вазъи саломатии 355 сарбозашро бисёр хатарнок эълон кардааст.
Дар ҳамин ҳол мақомоти Исроил мегӯянд, 29 нафар аз сарбозони артиши ин кишвар ҳангоми амалиётҳо дар Ғазза бо тири ҳамсафони худ кушта шудаанд.
Аммо аз ҷониби дигар, дақиқаҳои аввали шаби 1-уми январи соли 2024 гурӯҳи Қассом – шохаи низомии ҲАМОС Телабиб, пойтахти Исроилро мушакборон кард. Қассом дар охирин нашрияи худ хабар дод, ки давоми 48 соати ахир танҳо дар кӯчаҳои Туффоҳ ва Дараҷ беш аз 20 сарбози исроилиро ба қатл расонида, 26 тонку худравҳои низомиро ба таври куллӣ ва ё ҷузъӣ аз байн бурдааст.
Дар ҳоле, ки се моҳ боз ҷанг дар Ғазза идома дорад, Исроил аз ақибнишинии чандин гардонҳои худ хабар дод, аз ҷумла сарбони Исроил субҳи рӯзи сешанбе, 2-уми январ аз минтақаҳои Шайх Ризвон (шимол), Мухайяму Шотиъ (ғарб), Шуҷоъия, Туффоҳ ва Зайтун (шарқ)-и Ғазза ақибнишинӣ кардаанд. Ин дар ҳолест, ки ду рӯз қабл Исроил аз ақибнишинии 5 гардони худ аз минтақаҳои ҷанг низ хабар дода буд.
Пас аз ақибнишинии сарбозони исроилӣ наворҳое дар шабакаҳои иҷтимоӣ роҳ ёфтаанд, ки сокинон минтақаи Шайх Ризвон пас аз берун рафтани нерӯҳои Исроил хонаҳо ва кӯчаҳоро ба навор гирифтаанд, ки дар онҳо дида мешавад, ҳаҷми харобиҳо хеле бузург аст. Тақрибан ҳеч хонае обод намондааст. Дар ин наворҳо дида мешавад, ҷасади беҷони даҳҳо тан аз сокинон дар кӯчаҳо хобида аст.
