Вазорати корҳои дохилии Тоҷикистон вазифадор шудааст, ки сафи кормандони Бозрасии давлатии автомобилиро кам кунад.
Бино ба иттилои расмӣ, 19-уми январи соли 2024 Эмомалӣ Раҳмон дар ҷаласаи Шӯрои амнияти миллӣ аз кори кормандони Бозрасии давлатии автомобилӣ дар вилояти Хатлон интиқод кард.
Ҳамзамон Эмомалӣ Раҳмон баъд аз баргузории ҷаласаи мазкур билофосила бо судури як фармон гуфт, ки ҳадаф аз ихтисори кормандони БДА “таъмини самаранокии фаъолияти Бозрасии давлатии автомобилии Вазорати корҳои дохилии Ҷумҳурии Тоҷикистон” аст.
Эмомалӣ Раҳмон дар фармонаш таъкид карда ки: “Воҳидҳои кории Бозрасии давлатии автомобилии Вазорати корҳои дохилии Ҷумҳурии Тоҷикистон 30 дарсад ихтисор карда шаванд.”
Ҳамчунин дар ҷаласаи Шӯрои амнияти Тоҷикистон Эмомалӣ Раҳмон чанде аз раҳбарони мақомоти қудратӣ ва интизомӣ дар минтақаи Кӯлоби вилояти Хатлонро ҳам ба сурати дастаҷамъӣ аз вазифа озод кард.
Бозрасии давлатии автомобилии Вазорати корҳои дохилии Тоҷикистон дар муддати беш аз 30 соли ҳукумронии Эмомалӣ Раҳмон ҳамоно яке аз фасодзадатирин ниҳодҳо боқӣ мондааст.
